admin
Charity Moyo
KULENINA leSamlodi eGwanda elitshiye izakhamizi zakule indawo zikhuza umhlola ngemva kokutshisa umntanalo oleminyaka emihlanu ngamafutha ngoba lifuna ukukhawulisa umkalo.
USenzile Myanga (25) wenze ihlazo leli ngoMgqibelo kuviki ephelileyo.
Kuzwakale ukuthi ngalelolanga uMyanga waxabana lomkakhe, uThembalami Moyo bebanga ukuthi wayehambe wayathatha umntwana lo kunina engamtshelanga.
Umfakazi oqotho uMnumzana Takesure Dube ubikele intathelizindaba ukuthi uMyanga wathi ebona umkakhe engena lomntwana lo oleminyaka emihlanu wahle wadla amalahle ethi ngeke agcine umntwana womunye umfazi.
“UMoyo wathi efika lomntwana ekhaya uMyanga kazange abuquthe ngitsho ngoba walala ethetha kwaze kwasa ethi kungani umkakhe emlethela umntwana womunye umfazi,” kulandisa uMnu Dube.
Kuzwakale ukuba mhlaka 8 Ncwabakazi uMyanga wavuka wabilisa amafutha ethi ufuna ukupheka amagwinya kanti usenga ezimithiyo.
“UMyanga wathi amafutha akhe esetshisa wabiza umntwana lo ethi amqhubele inditshi kodwa ngesikhatshana nje samuzwa esahlaba umkhosi asazi ukuthi kwenzakalani emkulwini ngoba babebabili kodwa sicabangela ukuthi wamthela ngamafutha,” kuchaza uMnu Dube.
Intatheli ikhulumisane loMoyo ecingweni wachaza ukuthi yena wezwa ngomkhosi wasegijima wayakhangela wafica umntanakhe esetshile umzimba lenyawo.
“Kuliqiniso ukuthi umkami watshisa umntanami ngamafutha, ngibuhlungu kakhulu ngesenzo lesi ngoba bengingathembi ukuthi umkami angenza isihlungu esingaka emntwaneni.
“Angeke ngimvikele futhi ngoba waqala wasola ukuthi kungani ngithethe umntanami ukuthi sihlale laye.
“Ngangithi kumbe kuzaphelela ekukhulumeni kuphela kuthi ngokuya kwamalanga akwamukele ukuthi umntwana kalacala njalo kazilutho,” kutsho uMoyo.
Imizamo yokukhuluma loMyanga yehlule.
UMthunywa uxhumane lesikhulumi samapholisa esabelweni Matabeleland South uInspector Philisani Ndebele uthe kabakawamukeli umbiko lo.
Online Reporter