Kuthakazelelwa usuku lwamaqhawe koByo

Charity Moyo
BEKUNGABIZWA ozwayo edolobheni lakoBulawayo  ngoMvulo kuyonale iviki ngesikhathi kunanzwa usuku lwamaqhawe azinikelayo ukuthi ilizwe leli lithole uzibuse.

Uzulu  ubethe gwaqa enkundleni yeProvincial Heroes Acre elokitshini leNkulumane ethakazelela usuku lolu.
Umkhosi lo uqale ngokuhlatshelwa kwengoma yesizwe ikhokhelwa yiZimbabwe Prisons and Correctional Services    (ZPCS) kunye leZimbabwe National Army (ZNA).

UMinister of State for Pronvincial Affairs uKhomuredi Nomthandazo Eunice Moyo ubale inkulumo kaMongameli welizwe.

Ekhuluma kulumbuthano uKhmrd Moyo uveze ukuthi ilanga leli kumele lihlonitshwe njalo liqakathekiswe nguye wonke umuntu wakuleli. Uqhubekele phambili esithi ngaphandle kwawo amaqhawe ilizwe kalisilutho.

Uveze njalo ukuthi abantu babuthene ukuze bakhumbule ezinye izizalwane zelizwe ezalahlekelwa yimpilo yazo ukuze zilethe inkululeko. Ngaphandle kwawo amaqhawe ilizwe lalingasoze limthole uzibuse, ngakho baqakathekile elizweni.

Ubuye waphatha udaba lokuthi bafanele ukuphiwa inhlonipho ngoba balwela ilizwe kanye lozulu wonke. Kabazange badinwe kodwa bazinikela ukuthi bafele ilizwe lethu.

Uthe uHulumende uzinikele ukuthi izizalwane zonke zakuleli zithole amalungelo azo. Imfundo izathuthukiswa njalo wonke umuntu uzakuba lethuba lokuthi afunde, kuthi indimi zonke zizasetshenziswa njengendlela yokufunda ukuze lungabikhona ubandlululo kodwa kube lokubambana elizweni.

Uqhubekele phambili eveza ukuthi uHulumende uyabapha udumo labo abalahlekelwa yizihlobo zabo kumpi yenkululeko. Ngokunjalo imuli zamaqhawe zilelungelo lokuthola imfundo zibhadalelwa nguHulumende, ukwelatshwa kanye lokubanakekela.

Emkhosini lo bekulamaqembu atshiyeneyo abethokozisa uzulu agoqela iluba lemvelo ebelihlabela ingoma zesintu kanye lokugida isitshikitsha.

IRythms of Revolution icule ingoma zokubonga amaqhawe afana loMdala wethu uDokotela Joshua Mqabuko Nyongolo Nkomo.

Enye imbongi uBruce Khumalo uhaye inkondlo ebonga uthando lwamaqhawe lokuzimisela ekukhululeni ilizwe.

Abalweli benkululeko baphiwe ithuba lokuthi bahlabelele.