Online Reporter
YiNtatheli kaMthunywa
NGENXA yokuthanda ukubheja, kulenye indoda yakoBulawayo etshontshele unina imali eyedlula i-US$10 000, qede lapho yahuquluza yonke ibheja kumdlalo we-Aviator.
Umdlalo we-Aviator udume kakhulu enkundleni zokubheja ebulenjini.
UMcMillan Zimunhu, oleminyaka yokuzalwa engu-22, kubikwa weba imali efika i-US$10 300, eyayigcinwe ngunina endlini, eyibekele ukuthi izasetshenziswa ukuqhuba amaphorojekithi athile okwakha.
Wathatha limali wayiphosela kumdlalo ka-Aviator, wadliwa yonke.
Amapholisa eNkulumane aqinisekise ngokubotshwa kukaZimhunu, ohlala eNkulumane 11.
Isikhulumi samapholisa koBulawayo u-Inspector Nomalanga Msebele uthe umama kaZimhunu oleminyaka yokuzalwa yokuzalwa engu-48, wayegcine imali le endaweni ezinengi endlini kusukela ngo2013 kuze kufike uZibandlela ka2026.
Inina leli lilabantwana abahlanu njalo bonke babesazi ngemali le. UMcMillan ngumntwana wesibili.
“Bonke abantwana abahlanu babesazi ngemali le. Umama lo wahlola imali yakhe ngoMpanduka 2025, wayibala yafika i-US$10 300,” kutsho u-Insp Msebele.
Kubikwa mhlaka 19Zibandlela 2026, inina leli lananzelela ukuthi imali kayisekho, nanko wayesefuna ukuyisebenzisa. Wabikela amapholisa ngodaba.
Ngemva kokwenza uphenyo, kubuzwa abantwana, amapholisa athola ukuthi imali yatshontshwa nguZimhunu.
“Wavuma ukuthi wasebenzisa yonke imali ebheja ku-Aviator, wehlulwa,” kutsho u-Insp Msebele.
Imali yonke abheja ngayo kayitholakalanga.
Amapholisa akhuthaza amalunga omphakathi ukuthi asebenzise amabhanga, enqabele ukugcina imali ezinengi ezindlini.
