admin
KULENDODA eleminyaka yokuzalwa engu-30 ehlala epulazini leSerui Source eNyamweda eMhondoro duze ledolobho leNorton, esolelwa ukuba itshontsha impahla yabesifazane yangaphakathi ngemva kokutholakala ilesikhwama esigcwele izikhindi zabomama okuthiwa izisebenzisa ukuzijabulisa.
Impahla zangaphakathi lezi kubikwa zafakwa phakathi kwe 20 litha yebhakede lagcwala. Ngaphandle kwalokho, indoda le ilomkhuba wokulunguza omama abagezayo labantu abayabe besezindlini besenza ezothando.
Ngeviki ephelileyo ngemva kokuba sokulesikhathi eside omama lamankazana beswela impahla zabo zangaphansi, kwatholakala isikhwama esigcwele izikhindi zabomama endlini yalindoda okubikwa kayithathanga.
Ezinye zakhona kuthiwa bezingcolile kutshengisa ukuthi umsolwa ubeseqedile ngazo. UTrust Mutsiwawo Tsanguma oleminyaka engu-30 nguye olendlu okuthiwa kwatholakala kiyo isikhwama esasigcwele impahla yabafazi yangaphakathi leyo eyagcwala i-20 litha yebhakede.
UTsanguma kubikwa ukulandule ukuthi ulecala wathi impahla zangaphakathi lezi ezitholakale endlini yakhe ngezentombi yakhe.
UNkosazana Loveday Chibamu oleminyaka engu-48, ongomunye wezakhamizi endaweni le ugcizelele indaba yokuthi kwatholakala impahla yabesifazane zangaphakathi ezazigcwele isikhwama endlini kaTsanguma.
“Mina ngabizwa ngabona omama labobaba behlangene behleli bekhuluma ngokuthi impahla zangaphakathi ezazicatsha zitholakale endlini kaTsanguma. Endlini yakhe kwatholakala imbiza, imiganu, inkezo lamankomitsho lakho ayekutshontsha,” kutsho uNkszn Chibamu.
Abanye omama lamankazana kubikwa bazibona impahla zabo zangaphakathi kodwa abazithathanga, bazilahla besesaba ukuthi zingabe zisetshenziswe ekwenzeni imithanithani yobuthakathi.
“Umsolwa kubikwa uphila ngama piece job. Nxa simbuza ukuthi kuhamba njani uthi yena impahla lezi uzifaka esithweni sakhe sangasese nxa engezwa efuna owesifazana,” kutsho uNkszn Chibamu.
UNkosazana Evernice Martin oleminyaka engu-28 ohlala ndawonye loTsanguma wacatshelwa yimpahla yakhe yangaphakathi wayithola ilalezi ezatholakala esikhwameni sika Tsanguma.
Impahla zami zangaphakathi ezacatsha ecingweni lokuchaya impahla e ‘change house’ ngizithole esikhwameni sendoda le. Ngizijikele esambuzi ngoba bezingcolile.
“Uthi ufaka impahla lezi esithweni sakhe kodwa katsho ukuthi ukwenzelani,” kutsho uNkszn Martin.
Kubikwa omama abacatshelwa yimpahla yabo yangaphakathi badlula itshumi.
UNkosikazi Edinah Saika Kujokera ongumama wekhansilini endaweni le kuWadi 15 uthi wacatshelwa yimpahla yangaphakathi edlula itshumi.
“UTrust Mutsiwawo Tsanguma wayengisebenzela lapha ngicatshelwa zimpahla zangaphakathi zaze zaba litshumi. Wayezithatha ecingweni lokuchaya impahla loba endlini, odadewethu abathathu ababengivakatshele labo bacatshelwa ngezabo. Lalamuhla lokhu abazange baphenduke lapha,”kutsho uNkkz Kujokera.
“Isikhwama esasigcwele impahla zangaphakathi sasithola endlini yakhe njalo kwakutshontshwe lamagwili. Abantu babefuna ukubona endlini yakhe lokudinga impahla zabo zangaphakathi.
“Sathola ezethu salahlela esambuzini. Kwakhulunywa ngombobobo kodwa asila bufakazi ngakho,” kutsho uNkkz Kujokera.
UTsanganu lo oleminyaka yokuthi sengaba ngumkhwenyana, uluma indebe ngendaba le kungakhathalekile ukuthi uyavuma ukuthi watholakala elempahla zabafazi zangaphakathi endlini yakhe.
“Liqiniso ukuthi ngatholakala lempahla zabafazi ezangaphakathi kodwa zazingagwcali ibhakede ngoba zazizinhlanu kuphela njalo ngezentombi zami ezintathu.
Ngilamanga ngibona isiketi senkazana engumakhelwane angikwazi ukuthi safika njani endlini yami,” kutsho uTsanguma.
Online Reporter