Online Reporter
Tendai Gukutikwa
KULENINA elithengisa esiqintini sakoMutasa, eManicaland elethesa elinye icala lokutshontsha amagwili alo, lokuthi liyamthakatha ngokumvala amehlo.
Lokhu kuvele emthethwandaba wenduna uMutasa ngoMgqibelo odluleyo lapho uMargaret Foro amangalele uRudo Matekenya, ongubabakazi wakhe.
UForo uveze ukuthi uMatekenya nguye owatshontsha amagwili akhe, wabangela lokugula kwakhe.
“Sigcina amagwili ethu esiphaleni sinye. Ngolunye usuku kusihlwa, uMatekenya wathi wayetshiye ifoni yakhe wabuyela e-storeroom yedwa. Kusisa amagwili ami ayesenyamalele.
“Okungixakayo yikuthi ngahle ngavaleka amehlo ngelanga elilandelayo. Lesi isehlakalo saphinda senzakala.
Ngingabeka amagwili ami e-storeroom, ayanyamalala, abonakale embizeni kaMatekenya,” kutsho uForo.
Uqhubeke wathi: “Ngaso sonke isikhathi nxa kungatshontshwa amagwili ami, ngiyagula. Ngicina ngingasaboni njalo ngiphathwa yibuhlungu bekhanda. Ngagula inyanga ezine kusiya kwezinhlanu. Ngithembele kwabanye ukuze ngithole ukunakekelwa.
“Ukugula kwami kuhlangana ngqo lokutshontshwa kwamagwili. Ngigula nxa kungatshontshwa amagwili njalo uMatekenya uphakathi kwakho. Ngiyazi ukuthi kwenzekani, angiqambi manga.”
Lomama kaForo, uBenadette Chikeya, ukuqinisekisile lokhu.
“UMargaret wayevame ukuphindela ekhaya ekhala ngokuthi kutshontshwe amagwili. Sasola uMatekenya satshiya ukuwagcina e-storeroom amagwili. Sawafihla ehlathini, kodwa ukweba kwaqhubeka,” kutsho uChikeya.
Isehlakalo lesi sesidale ukuthi kube lensolo zokuthakatha phakathi kwemuli lezi.
“Salanda imuli kaMatekenya, sifuna ukuthi basiphelekezele enyangeni ukuze sivumbulule iqiniso. Singasichaza njani isifo sikaMargaret esingaqondakaliyo, esibakhona nxa amagwili akhe engatshontshwa?” kubuza uChikeya enkantolo.
UChikeya uthe abala ubufakazi obugcweleyo obokuthi bangamangalela uMatekenya emapholiseni, yikho befuna ukuthi kuxazululwe yinyanga.
UMatekenya wale wemba phansi.
“Kuyangimangalisa ukuthi uForo uthi ngiyamthakatha. Sihlanganiswa ngumtshado njalo kangitshontshi, kangithakathi. Sibanengi esithengisayo, sigcina into zethu e-storeroom.
Kwake kwaba lesikhathi lapho okwatshontshelwa wonke umuntu. Ngenxa yokuthi ngabika ngokutshontshelwa kwami, uForo wacabanga ukuthi yimi engimtshontshelayo. Umama wakhe watshela ubaba, esithi ngithakatha uForo. Ngamanga lawo.”
UMartin Matekenya, ubaba kaRudo uthe: “UBenadette Chikeya wafika kimi wangitshela ukuthi indodakazi yami iloya umntanakhe. Babefuna siye enyangeni kodwa ngala. Akukho kuhle ukuthi bethese indodakazi yami icala elinje.”
Induna uMutasa ithe kungcono ukuthi bathole usizo kwabezomthetho kumbe badinge usizo kulabo abelapha ngokomoya lakubosiyazi.
“Nxa ucabangela ukutshontshwa kwamagwili, mangala emapholiseni. Inkundla le kayiphathi indaba zokucabangelana lobuthakathi. Ukutshontshelwa yindaba yamapholisa,” kutsho induna uMutasa.
