admin
Ethel Ncube
KULENDODA yeNtalale eGwanda esele igula ingqondo ngemva kokuntshontshelwa isibaya sonke sabobabhemi.
Indaba le yenzakale emavikini amabili adluleyo lapho uMnumzana Dumisani Nare ethe evuka ekuseni esiyalungiselela ukuyaphendula emasimini wathola isibaya sikhala ibhungayezi kungela ngitsho oyedwa ubabhemi wokubopha.
Ekhuluma lentatheli omunye wezakhamizi zakule indawo uMnumzana Ellias Dube uveze ukuba umnikazi wabobabhemi usele elesithuli okubangele ukuthi angaphatheki kuhle.
“Mina ngabizwa ngumntwana esithi ukhulu wakhe usetshontshelwe obabhemi. Ngathi ngifika ngathola umuntu omdala uvalo solumtshaye waze wazitshiya ekhala ngabobabhemi bakhe sivele singasezwani lenkulumeni ukuthi ngithini wayevele engasangizwa.
“Ngathi ngibuzisisa umntwana lo wathi bathe bevuka ekuseni bathi belande ukuyabopha obabhemi bathola isibaya sivulekile kukhala ibhungayezi wahle watshiya ukhulu esekhuluma yedwa ebhodabhoda isibaya sonke,” kubika uMnu Nare.
Uqhubekele phambili eveza ukuba obabhemi laba lomzila wakhona akukazwakali.
“Obabhemi laba lokhe bedingwa, akula loyedwa osezwe ngomzila wabo, abanikazi sebecabanga ukuba bayefika kubosiyazi nanko phela lokhulu lokhe egula ngabobabhemi bakhe angabonakaliyo.
“Lakhathesi uNare lokhe engezwa kuhle, izinto azikhulumayo aziqondakali osokusenza ukuba abakibo bathi kungcono babhode ebantwini bazwe ukuba kuhamba njani ngabobabhemi laba,” kuveza uMnu Dube
UMthunywa uxhumane lelinye ilunga lemuli uNkosazana Silindiwe Dube oveze ukuba kuliqiniso ukuba batshontshelwa.
“Abantu bavuka betshontshe obabhemi abangu-8 bonke esilima ngabo, ukhulu wahle wasala esephambene ingqondo, asazi kumbe ngamaloyo kumbe yikucabanga kakhulu.
“Njengemuli sizama ukuba sike sibhode ebantwini sizwe ukuba kuhamba njani ngoba sesibhudule ngabobabhemi asibaboni, lokhulu laye lokhe evuka ekuseni ayebhoda esibayeni ekhuluma yedwa okuyinto esikhathazayo kakhulu,” kuphetha uNkszn Dube.
Online Reporter