Online Reporter
Mkhululi Ncube
Izakhamuzi zeBulilima esabelweni seMatabeleland South, ziphethe izibindi ngezandla kulandela ukubonakala kwemvubu kwelinye idamu esigabeni.
Kulembiko ethi imvubu le ingabe seyahlala umnyaka izula zula edamu leCuesteds, elibude buduzane ledolobho lePlumtree.
Indawo le, elamadlelo amahle, ilezinye inyamazana zasendle ezitshiyeneyo.
Ukuvela kwemvubu phakathi kwedamu elisetshenziswa yizakhamizi lezifuyo kuletha uvalo kwabanye, ngesikhathi sinye kwaba lokwanda kwabantu abafuna ukuzibonela mathupha inyamazana le, ejwayeleke kumifula lamadamu amakhulu.
Kubikwa labantwana besikolo sebefika kulelidamu, bethatha imifanekiso, befunda ngempilo yemvubu.
Kunkundla yokuxhumana eyeWhatsApp, abantu bakholelwa ukuba imvubu le ingabe yabekwa ukuthi ivimbele labo abathiya inhlanzi okungekho emthethweni.
“Yabuya lenjiva. Izanyamalala zingahamba.”
“Kuyangimangalisa ukuzwa ngemvubu eSiyana Dam. Abantu bebegcwele lapha bethatha imifanekiso. Imvubu le ibibhoda bhoda edamu njalo ikhanya ingelankinga ngokuza kwabantu,” kutsho omuye njalo kuSocial Media.
Ngesikhathi sekhefu, bekulabantu abavela eGoli abavakatshele idamu leCousteds ukuzobona imvubu le.
NgoLwesine, izikhamizi zeTjankwa laseMboniso zivuke zibona imvubu le eSiyana Dam.
“Ngizwe ngemvubu le ngaze ngafika edamu kodwa ngehluleka ukuyibona. Mhlawumbe ibizidlela utshani kwenye indawo,” kutsho uDokotela Madlozi Moyo oweDiba.
Isisebenzi seBulilima Rural District Council uMnumzana Lizwe Tshuma uthe kwakulemvubu ezimbili njalo bacabangela ukuthi enye ingabe yabulawa.
“Imvubu isihlale umnyaka edamu leCuesteda kodwa kayihluphi muntu. Kulabantu nje abayikhathaza ngokuthumela izinja nxa isidla phandle kwamanzi.”
Uthe uzwe umbiko wokuthi umnikazi wedamu leSayina ngukhansila kaWard1 eTjankwa.
