Online Reporter
YiNtatheli kaMthunywa
IZAKHAMIZI zesiqintini seDabe, esigabeni seNkayi esabelweni seMatabeleland North, zilokhu zikhakhamele kulandela ukuzwa ngenye indoda ehlahlela amadodana ayo amabili andubana izibulale.
UZenzo Ncube, obeleminyaka engu-47 yokuzalwa kubikwa wahlahlela abantwabakhe ababili uMandlenkosi (8) kunye lo Zimisele (5), kumaviki amabili edluleyo, wasesiyazibophela enxuweni lomnewabo owedlula emhlabeni.
NgoLwebili intatheli ivakatshele esiqintini seDabe, lapho ethole izakhamizi zilokhu zitshwaqe umzimba ngesiga esenzakalayo.
UNkosazana Sibonginkosi Tshabalala, othethwe ngumnawakhe kaZenzo, uthe lalamuhla lokhu abantwabakhe lokhu behlukumezekile ngendlela abazawabo ababulawa ngayo nguyise.
“Abantwana babedlala bonke, besidla bonke futhi, kunzima lokukunakana ukuba uMandlenkosi kunye loZimisele babulawa nguyise,” kutsho uNkszn Tshabalala.
Imuli le ibekwe esigabeni lesi kuviki edluleyo.
Ngombiko wamapholisa, osengumuyi kubikwa wayelomkhuhlane wengqondo njalo wayethatha imithi yakhona.
Kubikwa wayehlala yedwa labantwabakhe ababili kusukela ngesikhathi efelwa ngumkakhe, laye owazibophelayo ngomnyaka ka-2023.
Isikhulumi samapholisa elizweni uCommissioner Paul Nyathi uqinisekise ngesehlakalo lesi.
“Kulendoda yeMahlikihliki, eNkayi, uZenzo Ncube (47) egamule abantwabayo ababili amakhanda bafa. Indoda le ibiphila lomkhuhlane wengqondo,” kutsho uComm Nyathi.
Uthe uNcube esebulele abantwana wahudula izidumbu waphuma egumeni wahamba isibanga esingaba ngamamitha ayisikhombisa andubana afake lezozidumbu.
“Esuka lapho waqonda enxiweni lukamnewabo wafika wavula endlini wazibophela wafa.”
Kubikwa esinye isihambi sathi sisedlula sabona indlu ivuliwe sasondela sathola uZenzo evele esethule wahle wazisa ezinye izakhamizi, ezasuka zayakhangela abantwana bathola abantwana sebeganyulwe njalo kufakwe izigodo phezuli njalo kukhanya ukuba kuke kwazanywa ukubaswa umlilo kodwa wala ukulumatha.
