adminYintatheli kaMthunywa
ZISELE zikhuza imihlola izakhamizi zeMberengwa ngaphansi kwenduna uMketi ngemva kokuba enye indoda ikhethe ukuzibophela emzini wenyanga ngoba yale ukuthatha umuthi obusuqede imuli yayo.Inkemenkeme le yenzakale ngoMvulo kuviki ephelileyo.
Kuzwakale ukuthi umuyi uCephas Taruvinga obeleminyaka yokuzalwa engu-32, uzihilele emzini kaTafungwa Siziba oyinyanga edumileyo esigabeni.
Kubikwa ukuthi ababili laba babalokungazwisisani ngesikhathi umuyi esiyabisela umuthi wenhlanhla kanye lenotho ayewuphiwe yinyanga le.
Umfakazi oqotho othande ukwaziwa ngokuthi nguNdlovu nje kuphela ubikele uMthunywa ukuthi ngomnyaka ophelileyo uTaruvinga wahamba kusiyazi lo esiyadinga umuthi wenhlanhla. Kuthe ngokuya kwesikhathi kwabalokufa okungazwisisekiyo emulini okwakubangelwa ngumuthi lo okucatshangelwa ukuthi wawufuna igazi labantu.
Uveze ukuthi ukufa kwabantu lokhu kwacina kubangela ukuthi umdeni kamuyi uyedingisisa imbangela yezimfa lezi.
“UTaruvinga wahamba esiyadinga umuthi wenhlanhla njengomuntu owayesebenza eGoli engazi ukuthi wayesezithezele olulenkume ngoba abantu baqala ukufa okungazwisisekiyo emulini yakwabo.
“Abantu bafa okungelamkhawulo kwathi ngokuya kwesikhathi kwabanjwa ukuthi umuthi lo yiwo owawubaqeda, kungakho wathi ezama ukuwubisela inyanga yathi ifuna inkomo ezilitshumi ukuze iwamukele,” kutsho uNdlovu.
Kuzwakale njalo ukuthi ngesikhathi umuyi efika emzini wenyanga le kwaba lokuxabana okukhulu uSiziba esithi kazange adinge umuyi kodwa wabuya yedwa ezodinga umuthi lo.
UMthunywa uzwe ukuthi ngenxa yokuthi uTaruvinga wayengelazo inkomo ezilitshumi ezazifunwa nguSiziba watshona ehlezi emzini lo wazibophela abantu belele ebusuku.
UMthunywa wenelise ukuxhumana lomfowabo kamuyi uDambudzo Taruvinga yena oveze ukuthi kuliqiniso ukuthi umnewabo wazibophela emzini wenyanga.
Uthe umuyi waphiwa umuthi wenhlanhla nguSiziba engazi ukuthi wayephiwe undofa owayezafuna igazi labantu.
Uveze ukuthi emulini kwasokufe abantu abahlanu ngomnyaka owodwa ngakho bathi besiyabuza kwatholakala ukuthi imbangela ngumuthi lowo.
Intatheli ikhulumisane loMnu Siziba yena ongalulandulanga udaba lolu.
Ubike ukuthi ngomnyaka ophelileyo ngenyanga kaZibandlela umuyi wafika emzini wakhe edinga uncedo ngoba esithi izinto zakhe kazihambi kuhle. Uthe yena wamupha umuthi wamtshela lokuthi kumele awugcine njani.
“Umuyi nguye owabuya emzini wami edinga uncedo, ngamupha lokho ayekufuna ngathi uzangihlawula ngemva kokuba izinto zakhe sezihamba kuhle.
“Ngamangala ukubona esebuya esithi ufuna ukuwubisela, angalanga kodwa ngamtshela ukuthi ngifuna inkomo ezilitshumi ukuze ngiwamukele,” kutsho inyanga uSiziba.
Uqhubekele phambili esithi yena uyinyanga eyaziwayo esigabeni njalo uyancedisa abantu abanengi abafuna usizo kuye.
“Mina ngiyinyanga elodumo esigabeni, ngiyasiza abantu abanengi. Umuyi wehluleka ukukuzwisisa ukuthi lami ngangifuna inhlawulo yami ngakho wakhetha ukuzibulala kukanti sasingakhuluma sizwisisane,” kuphetha uSiziba.
Online Reporter