Vusumuzi Dube
Ethel Ncube
UMAHLEKISA wePlumtree odume ngokuhlekisa abantu enkundleni zokuxhumana ozibiza ngokuthi nguSa-Jakhobe usekhiphe ingoma ezimbili zokuthokozisa uzulu kunkundla zakhe zokuxhumana.
UTakudzwa Gladman Ncube odume ngokuthi Sa-Jakhobe useveze ukuba ukuhlabela yinto ayithandayo njalo ukhangelele ukuthokozisa.
Ekhuluma lentatheli, uSa-Jakhobe ubike ukuba ukuthokozisa uzulu kuye kusegazini.
“USa-Jakhobe ubike ukuba ukuhlabela yinto ayiqala esafunda e-primary school. Uhlobo lwengoma engizihlabelayo kuthiwa yi-lekompo njalo lezi ingoma ziyangithokozisa kakhulu. Okungenza ngihlabele ngithakazelela ingoma ezihlatshelwa ngu-Emmoh umhlabeleli weMzansi Afrika nxa ngilalele ingoma zakhe ngizwa ngibusiseka kakhulu ngazo. Ekuqaleni komnyaka ka-2026 ngikhiphe ingoma zami ezimbili ethi My Life Story lethi Ngizoba Grand. Ingoma zami lezi zikhona kukhasi lami le YouTube,” kutsho uSa-Jakhobe.
Ubuye waveza ukuba umuntu nxa ehlabela kumele athathe isikhathi sakhe alolonge ingoma zakhe hatshi ukugijimela ukukhipha ingoma kuphela.
“Ungabhala phansi ingoma yakho, ungakayikhiphi, hamba kubangane kumbe kwabanye abantu ufike ubalalelise ingoma zakho uthi bakutshele iqiniso lapho okumele ulungise khona, ulungise.
“Bengatsho amaphutha akho suzabuyela uyehlala phansi ulungisise lapho okulephutha khona andubana ukhiphe idlalade lakho. Asiyeni ku-Youtube balandeli siyelalela ingoma zikaSa-Jakhobe, ozafika kuqala uzajabulela masinyane ingoma zami,” kuphetha uSa-Jakhobe.
Online Reporter