Online Reporter
Fungai Muderere
LANXA i-FC Platinum yethule inqwaba yabadlali abatsha ngoLwesibili, imbiko evela kuleliqembu iveza ukuba kalikaqedi ukuthenga abadlali, nanko kulabanye okulindeleke ukuthi babikwe kusiyaphela yonale iviki.
Abafakazi abaseduzane lokwenzakala eqenjini baqinisekisa lokhu, bebika ukuba umqeqetshi uJoel Luphahla uphiwe imvumo yokuthi abumbe iqembu ngendlela ayifunayo.
Iqembu leZvishavane leli seliqinise lebhentshi lezingcitshi ngokuqhatsha u-Andile Ndebele njengomhlaziyi omkhulu. UDillion Chivandire usekuqembu leli njengomqeqetshi wokulolonga umzimba, kuthi uWarren Mapanga ngumqeqetshi wabonozinti.
I-FC Platinum iphinde yasebenza nzima ekulungiseni kakutsha iqembu ngemva kokuhamba kwabadlali abanengi ekupheleni kwesizini. Iqembu lenze masinyane ukuqinisa, lamemezela ukuthengwa komgadli uGarikai Dematsika ovela kuGreen Fuel lomdlali ohlonitshwa kakhulu uMcKinnon Mushore obekuHighlanders.
Umdlali odlala enkabeni yenkundla uDavid Mangezi sephinde wahlangana lomqeqetshi omkhulu uJoel Luphahla, laba sebake basebenza ndawonye kuTelOne.
IPure Platinum Play ithole njalo imvimbi ebikuqembu leYadah uTakunda Vareta kunye loMaxwell Paipi lo Tadiwa Muchenje. Kuthengwe njalo lonozinti odabuka eCameroon uManfred Ekoi, umgadli weGhana uEmmanuel Dogbey, loTjahikika Mbakondja oweNamibia.
