admin
Nkosilathi Sibanda
ESALELA muva idliwa yizinja!
Isitsho lesi sichaza okwenzakala enkambeni yeqembu lenguqu iHighlanders. Ngesikhathi amanye amathimu ematasatasa ngokuthenga abadlali, ekaMatshobana ihlezi phansi, ibika izikhalazo ezingapheliyo.
IHighlanders ikhala ngokuthi kuleqembu lakoBulawayo elihamba ngobusuku litshontsha abadlali bayo libathembisa ukubathengela izindulu, ukudla lokubabhadalela i-school fees, kutsho uNdumiso Gumede.
UMthunywa uzwe kakuhle ukuba uGumede usetshele umphakathi ukuthi abadlali bama-juniors kuHighlanders sebehugwa ngelinye iqembu ukwenzela ukuthi bengaphenduki kulisizini. Umaqhuzu weBosso lo ubike ngokungesabi ukuthi bebelesifiso sokuthi baphakamise abadlali abathile ukuze badlalele ithimu enkulu, kodwa inkokheli zananzelela ukuthi abafana abaselathando leHighlanders.
Kubikwa ithimu le ‘esitshontsha’ abadlali abasakhulayo beHighlanders isebenzisa iqhinga eliphezulu ngokuhuga abafana ukuthi bazaphiwa izipho abangeke bazithola kuqembu abadlala kulo.
Ekhuluma lomphakathi kuhlelo lweGrand Stand kumsakazo weSFM, uGumede uzwakale engokhala kabuhlungu ngesenzo sabacuphi babadlali abathunywe ngamathimu athile ukuthi babhidlize iBosso.
IHighlanders ilamathimu angaphansi abalisa ama-under 14, 16, le18. Eyinye yamathimu la izadlala kuligi ka-Division One emhlubulweni ongezansi yelizwe. Isimanga yikuthi inengi labadlali laba lasayina ukudlalela iBosso kuze kuyefika umhlaka 31kuMpalakazi 2015, okutsho ukuba kulinyanga abalaqembu.
“Kunzima ngoba bakhona abathembisa abadlali bethu, ikakhulu labo abasakhulayo kumathimu ethu ama-juniors.
Abadlali bethu bathenjiswa ukubhadalelwa i-school fees, i-rent lokuthengelwa inyama.
“Abazali babantwana laba bayatshelwa ukuthi umntwana uzaphiwa konke. Thina asikwenzi lokhu kuHighlanders,” nguGumede lo.
Loba uGumede ekhethe ukufihla ukuthi yiwaphi amathimu atshontsha abadlali babo, uMthunywa udingisise kabanzi kwatholakala ukuthi iqembu elihamba phambili ngeleBantu Rovers. Impi phakathi kwamaqembu la womabili kade yaqala. Kulabadlali okubikwa babaleke kuBosso besiya kutshintsha Guluva ngoba belande impilakahle engcono.
UMthunywa uxhumane lomaqhuzu weBantu Rovers uWilbert Sibanda obike ukuba kazi lutho ngalokhu njalo iqembu labo nxa lifuna umdlali othile lilandela imthetho efaneleyo.
Online Reporter