Online Reporter
Lovemore Dube
UMDLALI wenqindi ovela elokitshini leMinyela koBulawayo, uLawrence Chiyangwa udlale kuhle eMzansi loba enqotshiwe ngeviki edluleyo.
Ubehambe lomqeqetshi wakhe u-Anderson Sibanda ophenduke ephakamise ikhanda, ebobotheka phakathi kokunqotshwa, ngoba umdlali wakhe etshengise ukuthi ulekusasa elihle.
UChiyangwa ubekwe esitikini loJared Hensberg oweSouth Africa, enkundleni ye-Emperors Palace kumdlalo wakhe wakuqala phandle kwelizwe. Umdlalo lo ubuqoqwe yiziphathamandla zeGolden Gloves zikhokhelwa nguRodney Berman.
Umdlalo wabo wadonsa amahlandla amane, ngemva kokubambana, uHensberg waphiwa imiklomelo yonke, ngenyathelo le-spilt, okungazange kuthabise labo ababesekela uChiyangwa.
USibanda uthe bangabe benqotshiwe kodwa uyasuthiseka ngendlela uChiyangwa asebenze ngayo watshengisela ukuthi usendleleni eyiyo emdlalweni.
Okujabulisa uSibanda yikuthi uChiyangwa ubonwe ngabantu abaphethe umdlalo eMzansi, abeGolden Gloves.
“Singabe sanqotshwa ngemiklomelo kodwa sitshiye besazi ukuthi sesikhona,” kutsho uSibanda.
USibanda wazise uMthunywa ukuthi kulemizamo yokuthi umfana wakhe alwe njalo komunye umqhudelwano eChivhu. Umdlali lo uqoqwe ngowaye yintshatshu yenqindi kuleli kumdlalo oqoqwa nguCharles Manyuchi loClyde Musonda.
