Online Reporter
Fungai Muderere
ABALANDELI labathandi beHighlanders kumele babe sebephiwe imvumo yokuthi babumbe ingatsha eziqinileyo, ezilombono, ezizakuba losekelo oluzabaluleka, njengoba iqembu lifikisa iminyaka elikhulu lonyaka.
Umgcinisihlalo walithimu, uKenneth Mhlophe uthe njengenkokheli, bayazehlisa ngenhlonipho enkulu kubo bonke abasekela iBosso ngenhliziyo kuminyaka edluleyo, ebabaza ukuthi kungela sekelo lolu, ngabe iqembu kalikho lapho elikhona.
“Sizahlala sibonga kokuphela ngoba ubuhle beBosso ngabalandeli bayo,” nguMhlophe lo.
“Okwakuqala sibonga amalunga eqembu, labo abayinsika ekwethulweni kwenhlelo zeqembu. Sibuye lapho sibonge abasekeli bonke, ababukeli imidlalo yethu lalabo abasilandelayo labasithanda ngenhliziyo loba bekhatshana lakoBulawayo.
“Ngalezi izikhathi zobunzima, sethula isibongo sethu ngosekelo esilutholayo. Njengenkokheli sithembisa ukuthi sizakwenza imibono lamanyathelo aphakamisa iqembu ukuze kujabule wonke umuntu.”
UMhlophe uthe isizini le kumele yehlukane lezinye ngoba itsho okukhulu kumbali yeqembu eselifikise iminyaka elikhulu lokhe yasungulwa.
Umgcinisihlalo lo, osethole inhlonipho ngokusebenza gadalala, uthe abalandeli babo, abajwayele ukugcwalisa inkundla yeBarbourfields, kumele lonyaka bazithibe, babelembeko, behlukane lokuvusa umsindo.
“Izenzo ezimbi ziyasilulaza njalo zibalekisa abaxhasi bethu. Lo ngumnyaka wethu wesi-100 njengeqembu kumele sisekele ngokuzigqaja, sibengumzekeliso wokuthi inguqu iphathwa njani,” kutsho uMhlophe.
UMhlophe uncome losekelo abaluthole kumabhizimusi.
“Siqinisekisa ukuthi sizasebenza ngokuzikhandla lokuqhuba iqembu njengebhizimusi. IHighlanders ngumzekeliso omuhle kunguqu yeZimbabwe ngakho kuzahlala kunje.”
