Online Reporter
Mthabisi Tshuma
UMCULI weRhumba uGodolude ubika ukuba lonyaka usilindile isicoco seBulawayo Arts Awards nanko useqede iminyaka emine ekhethwa kodwa engasitholi.
Ukhethwe kumbango wesicoco se-Outstanding Male Artiste.
Isifiso sakhe singafezeka ngoba indlela asebenze ngayo lonyaka ikhwabithwe linengi labathandi bomculo weRhumba ezigabeni ezinengi eMatabeleland kunye laseSouth Africa.
Lapho okuzwakala khona iphimbo likaGodolude lezigcinci lomgido weqembu lakhe eze-Energy, kugcwala abantu. Okwakhathesi umculi lo uhamba phambili ngengoma yakhe ethi ‘Isibindi seLiqour’ esiqhunswa enkundleni zokuxhumana, emsakazweni lakuzo zonke indawo zobunandi emhlubulweni ongezansi yelizwe.
Ingoma le yakhitshwa mhlaka 31 Mfumfu njalo itholakala ezitolo zebulenjini.
Ebuzwa ngokukhethwa kumaBAA, uGodolude uthe: “Sengakhethwa kane kodwa angikanqobi. Ithemba engilalo ngelokuthi umnyaka lo ube ngowami, ngisithole isicoco,” kutsho lumculi.
“Ukukhethwa lokhu kuyangikhuthaza ngoba ngibalwe phakathi kwequla lamadoda azingcitshi kwezomculo. Ngingathola lesi isicoco, kuzabe kuyibhonasi kimi leqembu leze Energy.”
Ihlandla le-Outstanding Male Artiste uGodolude ukhethwe loMzoe 7, MJ Sings, Mr Bones, Fab G MshanakaGogo lo Ma9Nine.
