adminCourtney Munodawafa
VANHU vaive mudare vakakahadzika apo vamwe varume vaviri vakatsvukisirana maziso nenyaya yekurwira mukadzi, mumwe nemumwe wavo achiti mudzimai uyu ndewake.
Hatford Ndoro akamhan’arira Shadrach Chibaya kuHarare Civil Court achiti ari kumushungurudza pamusoro peaimbova mudzimai wake uyo waave kufambidzana naye.
Mutongi Noah Gwatidzo akapa Ndoro gwaro rerunyararo.
“Murume uyu anogara achiuya kumba kwangu achindivhiringidza. Anokonzera mhirizhonga achirova-rova musuwo wemba yangu, akapinda anondirwisa achindituka,” anodaro.
Ndoro anoti Chibaya aimbova murume wemukadzi waari kufambidzana naye.
“Aimbova murume wemukadzi wandiri kufambidzana naye uye vane mwana vose. Dai arega zvavari kuita, ngaasauye kumba kwangu kana kushungurudza vana vangu,” anodaro Ndoro.
Achipawo divi rake, Chibaya anoti Ndoro haatombomuziva.
“Murume uyu ndaisatomuzive, ndakatanga kumuona paakauya nemagwaro ekuti ndiuye kudare. Ari kunyepa, handisati ndambonetsana naye. Ndinganetsane sei nemunhu wandisati ndamboona?”
Anoti haana kurambana nemukadzi wake uye Ndoro anotova chikomba chemudzimai uyu.
“Ndikamuona anoudzwa nemukadzi wangu kuti atize uye ndikamubvunza mudzimai wangu anobva ati muzukuru wake. Ini nemukadzi wangu tichiri tose, hatina kurambana. Atori chikomba chemukadzi wangu,” anodaro.
Online Reporter