Online Reporter
Ethel Ncube
UMHLABELELI wengoma zokholo odabuka eSouth Africa, uSipho Makhabane, uzakwethekelel a koBulawayo ngoLwesine kuyonale iviki lapho anxuswe khona ukuzothakazelela ilanga lokuzalwa lomunye umfundisi wakoBulawayo.
UMakhabane ukhangelelwe ukufika ekuseni elungiselela umcimbi ozakwenzelwa eNketa 9 ngoLwesihlanu ntambama kuze kuse.
Ekhuluma lentatheli, uMakhabane uthe amalungiselelo okuza kwakhe koBulawayo asesezingeni eliphezulu njalo ukhangelele ukuhlangana labalandeli bakhe koBulawayo.
“Sekungiphuzele ukuza koBulawayo ukuze ngizojabula ndawonye labalandeli. Ngiza koBulawayo okwesithathu, nxa ngingaphambanisi. IZimbabwe likhaya lami lesibili njalo nxa ngilapho ngizizwa ngikhululekile njalo ngisekhaya.
“Ngiyayithanda indlela abafowethu beZimbabwe abatshengisa ngayo uthando kanye lendlela abasekela ngayo umculo wami. Batshengisa uthando olukhulu. Nxa ngibhala ibhuku lami, ngeke ngilibhale ngingafakanga abafowethu beZimbabwe,” kutsho uMakhabane.
Uqhubekele phambili eveza ukuthi ukuza kwakhe koBulawayo uthembisa uzulu injabulo lokukhonza okwezinga eliphezulu.
“Ngithembisa abafowethu injabulo yodwa nxa ngifika lapho. Angisoze ngifike nje ngingahlabelanga enye yezingoma zami. Ngizababingelela ngephimbo lami elimnandi kwenye yezingoma zami.
“Okunye njalo engikuthembisa uzulu yikuthi ngizavuselela abafowethu kukholo ukuze bazi ukuthi uNkulunkulu ukhona. Ngizabakhuthaza ukuthi bangalahli ithemba, kodwa baqine eNkosini, bakhonze uNkulunkulu njalo bamazi ukuthi ukhona.
“Ngithanda ukunxusa abantu bakoBulawayo ukuthi sihlangane ekuthakazeleleni ilanga lokuzalwa likaBig River, uMzingwane, ngoLwesihlanu. Asijabuleni sonke, sikhonze uNkulunkulu ndawonye,” kuphetha uMakhabane.
