Online Reporter
Nkosilathi Sibanda
UTHABO Senong, umqeqetshi omutsha weHighlanders uthe uzasebenzisa isikhathi sakhe ukuthi afunde aphinde avuselele ithemba kuleliqembu elacina ukuthwala isicoco seligi kuminyaka engamatshumi amabili edluleyo.
IHighlanders yacina ukunqoba isicoco sePremier Soccer League ngo-2006 ngaphansi kukaMethembe Ndlovu. UNdlovu lokhe engumqeqetshi omncane kulabo bonke owanqoba isicoco seligi eZimbabwe, nanko wayeleminyaka yokuzalwa engu-33 kuphela.
USenong, osethembise ukubisa isicoco lesi, uleminyaka engu-45 yokuzalwa njalo ngowakuqala umqeqetshi, ovela eSouth Africa ozakhuza iqembu leZimbabwe.
“Ngilangazelela ukuhlangana labadlali labalandeli. Kunengi okumele sikwenze. Ngizimisele ukufunda kuwo wonke umuntu,” kutsho uSenong efika koBulawayo kuliviki.
“Kumele sibone lapho esingaqinisa khona iqembu. Kasidlali sodwa ngakho kumele sikhangelisise amaqembu esidlala lawo, sigcine ibizo lesithunzi seqembu.”
Ukuqhatshwa kukaSenong kwethulwe ngoMvulo emadabukakusa lapho iqembu leHighlanders elazise ukuthi seliqhatshe loMkhokheli Dube ozabe engumsekeli kamqeqetshi.
USenong ungomunye obalelwa kubaqeqetshi abahlonitshwayo ngokuba zingcitshi zomdlalo kuzwekazi le-Africa nanko usethole impumelelo ekhuza iqembu leBafana Bafana, elabadlali abaleminyaka yokuzalwa engaphansi kweminyaka engu-20, kunye leqembu lelizwe leLesotho.
Waphumelela kakhulu ngesikhathi eqondisa iSouth Africa ithatha iCOSAFA Under-20 Cup ngo-2013.
IHighlanders ithe ukuqhatshwa kukaSenong kuhambisana lesinqumo seqembu sokwakha ithimu eqinileyo, eqeqetshwa kuhle, njalo ephakamisa intuthuko yabadlali abatsha.
“USenong ulempande eqinileyo ekuqeqetsheni abatsha, ekuhleleni ithimu, lokwakha ukubambana, okumenza abe yinzuzo enkulu eqenjini lethu,” kutsho umbiko weqembu.
Ngakwelinye icele, uDube, owake wadlalela iBosso, usebuyela ekhaya ephethe ulwazi olukhulu lwemidlalo yasekhaya laphetsheya.
Ukubuyela kwakhe kubonwa njengenyathelo elitsha enkundleni ngenxa yothando lwakhe, ukuzimisela kanye lokwazi kwakhe amasiko lemikhuba yeHighlanders.
“UMkhokheli wazi kahle isiko leBosso lemikhuba yalo, lokuthi iqembu lethu limeleni. Lolu ulwazi lokwenelisa kwakhe kuzakhuthaza abadlali, kuzasiza kakhulu eqenjini lethu,” kutsho iHighlanders.
Iqembu litshengise ukuthaba okukhulu ngokwamukela laba abaqeqetshi ababili, libika ukuba lithembe ukuthi bazaletha impumelelo ukulisizini.
Umbiko mayelana ngokwengezwa kwabanye abaqeqetshi labadlali uzakhitshwa ngesikhathi esifaneleyo.
Abaqeqetshi laba balomthwalo wokuthi baphakamise iBosso ibuyele kuzinga layo lakudala lapho eyayisaziwa njengeqembu elalinganqotshwa kalula.
Lonyaka iHighlanders ithakazelelela iminyaka engu-100 yasungulwa.
