Online Reporter
YiNtatheli kaMthunywa
KULENDODA yeZvishavane egwetshwe ukuyapika iminyaka engu-35 ejele kulandela ukudlwengula abantwana ababili bevela esikolo.
Umsolwa uElphas Mapfumo (26) kubikwa wadlwengula umntwana oleminyaka eyisikhombisa lomunye oleminyaka eyisificaminwe mibili kumahlandla amabili ehlukeneyo.
Kucala lakuqala, kubikwa mhlaka 23 Ntulikazi umamangala wakuqala wayevela esikolo esiya ngakibo labangane bakhe, uMapfumo wambamba isandla waxotsha abangane bakhe, wamdonsa waya laye endaweni ecatshileyo duzane lomgwaqo wamdlwengula kanye. Umamangala kubikwa wabikela esinye isihlobo ngokuhlukuluzwa kwakhe, unina wayabikela amapholisa mhlaka 24 Mpandula.
Kusehlakalo sesisibili, mhlaka 19 Mpandula, umamangala oleminyaka eyisificaminwe mibili wayehamba lomunye abafunda sikolo sinye oleminyaka eyisithupha bafika baphumula endleleni, uMapfumo wabuye watheleka wabamba umamangala ngentamo, wamdonsela egangeni wamdlwengula. Umngane wakhe wabaleka.
Kubikwa umamangala efika ngakibo wabikela unina okumehleleyo, amapholisa aqala ukuchwayisisa okwenza kwabotshwa uMapfumo.
INational Prosecuting Authority of Zimbabwe ichothoze isenzo sikamsolwa yabuye yancoma ukusukumela phezulu kwamapholisa okwenza umsolwa wabotshwa masinyane ukuze abhekane lamacala akhe.
Izehlakalo ezehlela abantwana laba, zikhumbuza abazali ngendingeko yokufundisa izingane ngengozi yabantu abangabaziyo, ukuba kumele bahlale beqaphele endleleni nxa besiya kumbe bevela esikolo.
I-NPAZ inxusa umphakathi ukuthi uqaphele futhi usekele abantwana ekukhulumeni ngokuhlukunyezwa okwehlukeneyo.
“Ukubika ngokuphangisa kanye lokuchwayisisa masinya kubalulekile. Uzulu kumele enze umlandu wakhe ukuvikela izingane ezingozini,” kutsho iNPAZ.
