Online Reporter
Fungai Muderere
UMDLALI wenguqu uJoel Ngodzo kuzwakala esengochaphe ibhoda elubhekise edolobheni lePolokwane, eSouth Africa lapho okubikwa ubizwe ngelinye iqembu lakulelo.
UNgodzo, osanda kwesula umhlaphansi, ubuyele emdlalweni kulinyanga, evumelana leqembu leGwanda Pirates elikuZifa Central Region Division One. Iqembu leli liqeqetshwa ngumnewabo uJohannes.
Kungakedluli amaviki amabili, uJoel (35), uhle wahugwa eSouth Africa liqembu okubikwa lifuna ukubona ukuthi usalawo yini umdlalo ezinyaweni zakhe.
Umqeqetshi weGwanda Pirates uJohannes uthe kuliqiniso ukuthi umdlali wakhe uchaphe uNgulukudela.
“Ubeqeqetsha lathi kuGwanda Pirates okweviki edluleyo. Usuke esiya ePolokwane ngemva kokubizwa ngomunye umcuphi wabadlali engingeke ngiqambe okwakhathesi.
“Ngumnyama nje ukuthi umakhalekhukhwini wakhe kangeni, kodwa ngiyakuqinisekisa ukuthi ulolonga lelinye lamaqembu asePolokwane,” kutsho lumqeqetshi.
UJoel, owathatha umhlalaphansi ngemva kokuba iCAPS United imkhiphe eqenjini, wake wadlalela iHighlanders leFC Platinum. Ubalelwa kubadlali bebhola lenyawo abalethalenta emangalisayo. Ngesizini ka-2009 wabizwa kuqembu leHighlanders lakuqala, wafika lapho wabonisa ababukeli bomdlalo ukudla kwamehlo.
Ngesizini eyalandelayo, uJoel wakhonjiswa wavuma yiFC Platinum, eyamthenga ngengqwaba yamadola eMelika, iUS$60 000.
Ngaleso isikhathi wayeleminyaka engu-20 yokuzalwa. Ngemva kokutshibilika kuqembu leZvishavane amasizini amane, umdlali lo waphindela kuHighlanders.
Kasahlalanga isikhathi eside kuBosso, nanko wahluthunwa ngokuphangisa liqembu leCAPS United ngo-2015.
Wavuka umdlalo walumfana owakhulela elokitshini leMzilikazi koBulawayo, encedisa iMakepekepe ukunqoba isicoco seligi ngo-2016. Amazulu avulekile kuye ngesizini ka-2019, ethola isicoco sokuba yiSoccer Star of the Year.
Ngomnyaka lo, iCAPS United yaqeda isizini ikunombolo yesibili.
Waqhubeka esenza kuhle enkundleni, wathathwa liqembu leBuildcon, eZambia ngo-2020. Zamjikela izinto, yaguquka impilo ekulelo, ngendlela engazange imphathe kuhle, wasetshiya.
Njengendodana yolahleko, uJoel waphenduka kuHighlanders kodwa kazange ahlale ngoba umzimba wakhe ungaqinanga ngendlela eyayifunwa ngabaqeqetshi.
I-Bosso yamkhafula ngemva kwenyanga eziyisithupha, wabuyela kuCAPS United, andubana athathe umhlalaphansi ekuqaleni kuka-2024.
