Online Reporter
Ethel Ncube
KULENDODA ye-Old Magwegwe koBulawayo ezibophele ephahleni lwendlu ngempelaviki ngemva kokubikela umakhelwane wayo ukuba ithwele nzima ngoba abantwabayo abayinakekeli.
UZebron Phiri oleminyaka yokuzalwa engu-54 uzihilele ngentambo lapho abehlala khona ngoba esithi uyadubeka, abantwabakhe bamhlamukele.
Kuzwakale ukuthi uPhiri wabikela omunye ugogo ongumakhelwane ukuthi abantwabakhe abamncedisi ngalutho kungakho kungcono ukuba afe futhi uzatshiya amafasiteli evulekile ukuze abantu benelise ukumbona lokungena endlini.
Kuthe ngelanga elilandelayo umakhelwane wabona amafasiteli evulekile wamemeza uPhiri kodwa wangasatshelwa muntu. Esizwa kungelamuntu osabelayo, wabiza omunye umakhelwane baya koPhiri bathi bevula bamthola ezibophele esedlule emhlabeni.
Babikela izihlobo zakhe andubana kubikelwe lamamapholisa abuya azothatha isidumbu asisa esibhedlela ukuyahlolwa imbangela yokufa kwakhe.
Intatheli ixhumane lesikhulumi samapholisa koBulawayo uInspector Nomalanga Msebele obike ukuba indaba enjalo isezandleni zabo.
“Sicela uzulu nxa angatshelwa indaba zokuzibulala lezi aziqakathekise, azame ukudingela umuntu okhulumileyo usizo masinyane.
“Indaba zokuzibulala singazikhangeleli phansi nxa umuntu ethi ufuna ukuzibulala umncedise elulekwe masinyane,” kubika uInsp Msebele.
