Online Reporter
Ethel Ncube
UZINJAZIYAMLUMA umhlabeleli kaMaskandi odabuka eTsholotsho, uzakwethula okokuqala idlalade elitsha kuleli eBulawayo Art Gallery ngoLwesihlanu kuyonale iviki.
Lokhe wasungula ezokuhlabelela uZinjaziyamluma ogama lakhe lokuzalwa nguMxolisi Nkomo uzabe eqala ukwethula idlalade koNtuthu.
Idlalade likaZinja elitsha lilesihloko esithi, Ningapheli amandla njalo lilengoma ezilitshumi.
Kukhangelelwe ukuthi kumcimbi lo abe exhaswe ngabahlabeleli ababalisa uMr Ungayithi Vu, Godolude, Utsheketsha Ogezayo, Indosakusa ikanti isethekeli esikhethekileyo sizabe singuBrema oweNsimbi zeZhwane.
Ekhuluma lentatheli uZinja ngokwethulwa kwedlalade lakhe uthe amalungiselelo ahamba kuhle.
“Ngizakwethula idlalade elithi Ningapheli Amandla ngoLwesihlanu eNational Art Gallery koBulawayo. Umcimbi wethu uzaqala ntambama ngo5 siqede masinyane abantu bahambe kusakhanya ezindlini.
“Abafowethu abakundima yezomculo bazabe bengixhasile ngisethula idlalade lami. Ngiyaqala ukukhipha idlalade koNtuthu lokhe ngaqala ukuhlabela kungakho nginxusa uzulu ukuba azozizwela engikuphekileyo,” kutsho uZinja.
Uqhubekele phambili eveza ukuba idlalade lakhe leli lizakholisisa abanengi.
“Ngizehlisa kini balandeli bakoBulawayo ngomculo wami ngidinga usekelo lwenu. Ngilithembisa ubunandi bodwa ezingomeni zami engizazethula. Ngisebenza gadalala ukuba ngikhiphe ingoma ezilohlonzi ezizakholisisa uzulu.
“Buyani lizozizwela engiliphekele khona lizwe ubunandi bukaMaskandi. Kuzabe kulabanye abafowethu abazangixhasa kumsebenzi lo labo bazatshayela abalandeli ingoma zabo, ukutshelwa yikuncitshwa,” kuphetha uZinjaziyamluma.
