Online Reporter
UMCULI waseLimpopo uMakhadzi usephumile esibhedlela ngemva kokuba kungozi yomgwaqo.
Umyalelo awunikwe ngudokotela wokuhlala ekhaya amasonto angu-10 ukuze alulame ekulimaleni engozini yemota, umculi uMakhadzi uwubona njengethuba lokubhala umculo omutsha. UMakhadzi ube kungozi yemota eMokopane, eLimpopo, mhlaka 31 Mpalakazi esuka ePolokwane esiya eGoli.
Okhulumela inkampani yakhe iMakhadzi Entertainment, uLucky “Slim” Tshilimandila, ekhuluma ezindabeni zeSABC ngempelasonto uthe ngesikhathi uMakhadzi esendleleni esiyanandisa eGoli umtshayeli wemota ababehamba ngayo wezwa umsindo uqhamuka emoteni. Wamisa imota efuna ukuhlola ukuthi umsindo usuka kuphi.
Kungaleso sikhathi lapho uMakhadzi abehamba labo abaphuma khona bethi bayazelula.
Uqhube wathi kwaqhamuka imota ababengayiboni yamtshaya.
Umtshayeli wakhe wamfaka emoteni wamgijimisela esibhedlela ePolokwane.
Uthe wahlizwa ihola lengxenye ngoba wayelimele ehlombe lasemzimbeni kwesingezansi.
Lo mculi wodumo lwezingoma okubalwa kuzo iMatorokisi, Number 1 lezinye, ukhiphe isitatimende ngoMvulo ekuseni echazela abalandeli bakhe ngesimo sakhe.
Ubonge ukwesekwa ngalesi sikhathi asichaze njengesinzima.
“Ngibona kudingeka ukuthi ngilitshele ngesimo sami ngalesi sikhathi ngenxa yothando lokungeseka elinginike khona, hhayi kuphela abalandeli bami eNingizimu Afrika kodwa e-Afrika lasemhlabeni jikelele. Sengiphumile esibhedlela, umdeni wami uzonginakekela kuze kube isimo sibuyela kwesijwayelekile,” kutsho uMakhadzi.
UMakhadzi ogama lakhe lokuzalwa nguNdivhudzannyi Ralivhona, uqhube wathi udokotela umeluleke ngokuthi alulamele ekhaya amasonto angu-10 engayi ukuyonandisa.
Uthe uyamethemba uNkulunkulu ukuthi uzokwenza isimanga.
“Ngiyambonga uNkulunkulu ngokuvikela iphimbo lami. Amasonto angu-10 angabukeka sengathi azoba yisikhathi lapho ngizizwa ngingedwa khona kodwa ngiyakholwa ukuthi uNkulunkulu unginika isikhathi sokubhala umculo omnandi,” kutsho uMakhadzi.
Uthe uzobe enganandisi kodwa uzakuya e-studiyo ayoqopha.
USlim uthe balindele ukuthi aqale ukunandisa ngePhasika.
