Vusumuzi Dube
Ethel Ncube
ABABONA ngokugcinwa kuhle kwenkomo zochago sebexwayise abalimi abafuye inkomo lezi ukuthi bavalele amathole lamathokazi ezibayeni enganethwa lizulu ngoba elakho ukucina ebanjwa yimikhuhlane.
UMnumzana Cosmas Muzunde ongu-Dairy Officer esabelweni seMatabeleland North usexwayise abalimi abafuye inkomo zochago ukuthi bavalele amathole lamathokazi abo ukuze anganethwa lizulu ngoba engabanjwa yimikhuhlane.
Uthe njengoba izulu lilokhe lisasekhona ukhuthaza abalimi ukuthi bakhele amathole lamathokazi izibaya ezifulelweyo.
“Njengoba izulu lisasekhona sikhuthaza abalimi ukuthi bananzelele amathokazi abo enganethwa lizulu njalo bawakhele izibaya ezilophahla ukuze nxa kusina izulu anganethwa,” kutsho uMnu Muzunde.
Uqhubekele phambili wathi amathole lamathokazi kafuni kuhlaliswa endaweni emanzi njalo elomqando.
“Sikhuthaza abalimi ukuthi bendlalele amathokazi abo esibayeni ngotshani obomileyo ukwenzela ukuthi amathole ahlale ekhudumala ngoba angangenwa ngumqando ayabanjwa ngumkhuhlane we-pneumonia ebesesifa,” kutsho uMnu Muzunde.
Uthe ukhuthaza abalimi ukuthi bebone ukuthi amathokazi ahlezi esibayeni esihlanzekileyo esingelamikhaza.
“Sikhuthaza abalimi ukuthi befafaze ezibayeni zamathokazi ukwenzela ukuthi bebulale imikhaza lempukane ngoba yiyo ebuya lemikhuhlane,” kutsho uMnu Muzunde.
Uphethe ngokuthi ukhuthaza abalimi ukuthi bakhele amathole abo izibaya eziphephileyo.
“Sikhuthaza abalimi ukuthi bakhele amathole abo izibaya befake imiduli eqinileyo ukwenzela ukuthi zingangenelwa ngamaganyane,” kuphetha uMnu Muzunde.
Online Reporter