Online Reporter
Kingstone Mapupu
VANA vatatu vanonzi vakafira mufish pond mushure mekuny’ura apo vaituhwinha kwaSabhuku Vengai kudunhu raMambo Mataga, kuMberengwa svondo rapera.
Mutauriri wemapurisa kuMidlands, Inspector Emmanuel Mahoko, vanoti vana vakany’ura mumvura ava vanosanganisa vaviri vemakore matanhatu okuberekwa nemumwe wemakore mashanu.
Vatatu ava vanonzi vakany’ura mufish pond yepamba paigara mumwe wavo sezvo vaiva vavakidzani.
“Tine nyaya inosuwisa yakaitika nemusi wa31 Ndira nenguva dza1700 hours kwaSabhuku Vengai kudunhu raMambo Mataga, kune vana vatatu vakawira mufish pond iri kuseri kwemba. Vana ava vanoti vaviri vemakore matanhatu nemumwe wemakore mashanu,” vanodaro Insp Mahoko.
Vanoti Alpheos Shumba (65) ndiye akawana mutumbi yevana vatatu ava yakayangarara pamusoro pemvura mufish pond iyi.
Mumwe wevana vakashaika aiva muzukuru waShumba.
“Fish pond yakawanikwa mitumbi yevana vatatu ava yakatandavara mamita 14 uyewo yakadzika mamita 1,5,” vanodaro Insp Mahoko.
Vanoti mapurisa akazoenda akanonyurura mitumbi yevana ava iyo yakawanikwa yakashama mbatya dzavo dzakakandwa chinhambwe chinokwana mamita matatu kubva pafish pond iyi.
Insp Mahoko vanoti pane fungidziro yekuti vana ava vakange vachituhwinha mumvura umu.
Mitumbi yavo yakazotakurwa
kuendwa nayo kumochari yeMusume Mission Hospital kuongororwa nanachiremba.
“Tinochema pamwe chete nemhuri nevabereki vevana ava uyewo tichikurudzira vanogara nevana kuti vatarise nzvimbo dzavanotambira nguva dzose. Pamusoro pezvo, mafish ponds anofanirwa kugara akakomberedzwa newaya kana rumwe ruzhowa kuti pasawane vana vanogona kutambira mumvura yemo,” vanodaro Insp Mahoko.
