Kingstone Mapupu
MAPURISA echikamu cheCriminal Investigations Department (CID) ekuBindura anoti akasunga varume vana nokuda kwemhosva yavari kupomerwa yekuba goridhe pamugodhi kuShamva, Mashonaland Central.
Vakasungwa ava vanoti Oliver Jere (23), Livison Jairosi (29), Obrian Junior Admire Kumbula (28), naAbraham Masvosvere (48).
Mutauriri wemapurisa muchikamu cheCID Detective Inspector Rachel Muteweri vanoti nomusi wa30 Gunyana gore rino, nenguva dza1.30 mangwanani, varume vana ava nevamwe vavo, vaisanganisira Misheck Jere, Rangarirai Jere, Calvin Muzenda naTrinix Manjengwa, avo vasati vasungwa, vakaenda kumugodhi wegoridhe uyu.
“Varume ava vakanosvika pamugodhi uyu vaine motokari yerudzi rweMitsubishi Sedan ine nhamba dzinoti AHR9320. Pavakasvika pamugodhi uyu, vakasvikotaura nemagadhi aiva pabasa, ndokubvutira mumwe wavo pfuti,” vanodaro Det Insp Muteweri.
Vanoti makororo aya akapinda pose pose achitsvaga zvakasiyana-siyana, ndokutora michina inobata goridhe, vachibva vatiza nayo iine simbi inokosha iyi.
“Nyaya iyi yakabva yamhan’arwa kumapurisa, achibva atanga kuifeya, achitsvaga makororo aya. Oliver Jere naLivison Jairosi vakabva vasungwa kuHarare, motokari yavakashandisa ikawanikwa.
“Kusungwa kwavo kwakaitawo kuti Obrain Junior Admire Kumbula naAbraham Masvosvere, vanova vashandi vepamugodhi uyu, vasungwewo,” vanodaro Det Insp Muteweri.
Vanoti pfuti yakawanikwa.
Mukufeewa kwenyaya iyi, zvakabuda pachena kuti vaviri ava ndivo vakanga vaendesa mashoko kune vamwe vavo nezvemashandiro emagadhi epamugodhi uyu kuitira nzira dzekuzoba nadzo.
Vanoti vasungwa aya vakazopinda muBindura Regional Court nomusi wa2 Gumiguru gore rino, vakanzi vazodzoke zvakare kudare vakachengetedzwa.
“Nyaya dzevanhu vanoshanda nemakororo vari mukati menzvimbo dzinozobiwa, kusanganisira makambani, dziri kuwanda.
“Tinokurudzira makambani kuongorora zvizere vanhu vavanopinza mabasa nekuramba vachivandudza mashandiro evarindi venzvimbo dzavo nekuona mikaha ingawanikwe yekubirwa,” vanodaro Det Insp Muteweri.
