adminRIMWE boka riri pasi pebazi redzidzo yepuraimari nesekondari, reZimbabwe Academy Learning (ZAL), rinoti riri kusimudzira dzidzo yevana vekumapurazi, zvikuru vanasikana avo vamwe vacho vari kusiira dzidzo panzira nekuda kwezvikonzero zvakasiyana.
ZAL inonyanya kubatsira vana vanoshaya avo vanenge vakatarisana nekusiira chikoro panzira.
Muhurukuro nemumwe mudzidzisi wepachikoro cheKuwadzanai Salvation Secondary School, muHarare, Mai Magaret Mapingire, avo vanove co-ordinator wechirongwa ichi pachikoro chavo, vanoti vana ava vari kubatsirwa nemari yechikoro, mayunifomu nezvimwe zvinodiwa pakudzidza kwavo.
“Muzvikoro zviri mumapurazi vana vasikana vari kuwanikwa vakawanda panyaya yekusiira chikoro panzira kana zvichienzaniswa nevakomana. Zvikonzero zvacho zvinosanganisira kushaikwa kwemari pamwe nekufirwa nevabereki,” vakadaro Mai Mapingire.
Vanoti kune vamwe vabereki zvakare vanokoshesa kuendesa mwanakomana kuchikoro pane mwanasikana inova pfungwa yekare sezvo vana vose vachifanira kupihwa mukana wekudzidza.
“Chinodiwa kune mhuri idzi kupangwa mazano, vazive kukosha kwemwanasikana. Hapana chakasiyana pamwanakomana nemwanasikana, vose vanoda kodzero dzakafanana nekuti dzidzo ikodzero yemwana wese,” vakadaro.
Vanoti zvikoro zviri kumapurazi zvinoda kusimudzirwa sezvo kune zvimwe zvacho vana vari kudzidzira pasi pemiti kana kuti mumadhirihora anopisirwa fodya.
Online Reporter