Online Reporter
Kingstone Mapupu
VANHU vatatu vakafa mutsaona kuZvishavane apo motokari yavo yakabonderana negonyeti.
Tsaona iyi yakaitika pachinhambwe che80 kilometre peg mumugwagwa weGweru-Zvishavane nemusi wa27 Chikunguru nenguva dza9 mangwanani.
Inspector Emmanuel Mahoko vanove mutauriri wemapurisa kudunhu reMidlands vanoti vakafa mutsaona iyi ndiLuckmore Mudzengi (29) wekwaSabhuku Mudzengi kwaMambo Nhema kuShurugwi, Phineas Muchau (37) wekwaSabhuku Chironde kwaMambo Nhema kuShurugwi,
nemumwe mudzimai asati azivikanwa zita rake nekwaanobva.
“Luckmore Mudzengi aityaira Nissan AD Van mumugwagwa weGweru-Zvishavane apo aive nevamwe vanhu vaviri mumotokari iyi. Vakange vave kusvika kuGweru pachinhambwe che80 Kilometre peg apo motokari yavo yakabonderana negonyeti remhando Shackman truck
ravaifanirwa kupesana naro. Gonyeti iri raityairwa naTakura Johane (26) wekwaSabhuku Mawhite kwaMambo Mapanzure, kuZvishavane,” vanodaro Insp Mahoko.
Vanoti Mudzengi nevamwe vaviri vaiva mumotokari iyi vakabva vafira panzvimbo.
“Zvakadai, mitumbi iyi yakaendeswa kumochari apo kuri kutsvagiwa hama dzemudzimai akafa mutsaona iyi. Semapurisa, tiri kukumbira vane ruzivo nezvemudzimai uyu kuti vaende kuZRP Zvishavane Traffic kuti vakwanise kunoongorora mutumbi uyu kumochari kwauri,” vanodaro Insp Mahoko.
Vanokurudzira vatyairi kutevedza mitemo yemumigwagwa nguva dzose kuitira kudzivirira tsaona dzerudzi urwu.
