Online Reporter
Kingstone Mapupu
MADZIMAMBO voyambira vanhurume vane katsika kekushungurudza pabonde vanasikana vasati vabva zera vachiguma vavapa pamiviri zvinozoita kuti vasiire dzidzo panzira kuti vasiyane nehunhubu hwakadai.
Mambo Ngezi, VaPeter Pasipamire, vanova Senator kuMashonaland West vanoti dambudziko revarume vanoshungurudza pabonde vanasikana riri kukukura munzvimbo dzakadai seMhondoro, Hurungwe, Kadoma, Chegutu, Sanyati, Norton, Banket, Zvimba neKariba.
“Semadzimambo ekudunhu reMashonaland West, tanetsekana nevarume vasina hunhu vanovhevhetedza vanasikana vasati vabva zera vorara navo vamwe vachiguma vabata pamiviri vosiira chikoro panzira. Tose takaita chisungo chekuti varume ava vanofanirwa kuiswa pasi peshamhu vorangwa zvakaomarara, pane miripo yatakatara yemombe shanu nembudzi, uyewo tovaendesa kumapurisa uko vanoendeswa kumatare edzimhosva vokandwa mumajeri,” vanodaro Mambo Ngezi.
Vanoti kunyangwe Hurumende yakanyevenutsa mutemo unotendera vanasikana vanenge vapihwa pamuviri kuti vaenderere mberi nedzidzo yavo, vakawanda vacho vanonyara kuramba vachionekwa nevamwe vana vachienda kuchikoro.
“Mudunhu redu rino kune zvikoro zvepuraimari nesekondari kune vanasikana vari kupihwa pamuviri nemazidhara asina hunhu aya, kunyanya nzvimbo dzakagariswa vanhu patsva. Zvinonyadzisa kunzwa kuti mwana weGrade 7 aitiswa pamuviri nemurume mukuru ane mhuri yake,” vanodaro Mambo Ngezi.
Vanoti kune dzimwe mhuri dzinovanza kuburitsa nyaya dzakadai vobhadharwa mari, mombe neimwewo pfuma asi kuita kwakadai imhosva huru inofanirwa kumhan’arwa kumapurisa.
“Musavanza nyaya dzakadai, mhan’arai nekukasika nhubu idzi dzisungwe,” vanodaro Mambo Ngezi.
Vanoti dzimwe nzvimbo dzanetsa nekuitiswa pamuviri kwevana vechikoro kumigodhi yemakorokoza.
“Veduwe regai dzive shiri mazai haana muto, vana ava tinoda kuti vaende kuzvikoro vogadzirira upenyu hwavo hwamangwana vozvishandira. Vangosangana nenyaya dzakadai idzi ngavakurumidze kumhanya kumapurisa nhubu idzi dzisungwe,” vanodaro Mambo Ngezi.
Mambo Nyamweda, VaNorbert Mandaza, vekuMhondoro zvakare vanotsinhira nyaya iyi vachishora varume vanodanana nevanasikana vasati vabva zera.
“Inyaya inorwadza kuti mwana ari Grade 7 anonzi apihwa pamiviri nemurume mukuru kunyangwe nevamwewo vakomana. Tinokurudzira vabereki kuti vaongorore mafambiro evanasikana vavo nevakomana vachivatsiura panyaya dzekupinda murudo vachiri ndumurwa,” vanodaro Mambo Nyamweda.
Vanoenderera mberi vachiti:
“Tinonzwa nyaya dzekunzi vanasikana vemagwaro ekubvira Grade 7 zvichienda mberi vava kuonekwa munzvimbo dzemafaro usiku. Inyaya dzinofanirwa kumhan’arwa dzomiswa nguva iripo.”
Mambo Chundu, VaAbel Mbasera, vekuHurungwe, avo vanovawo senator zvakare wedunhu reMashonaland West, vanoti nyaya yekupihwa pamiviri kwevanasikana vari pasi pezera inofanirwa kucherechedzwa nemapazi ose munyika kuti ipedzwe.
Kanzura Peter Chigogo vekuWard 15 kuMhondoro vanotsinhirawo nyaya iyi vachiti vanhurume vanoshungurudza pabonde vanasikana vachiri ndumurwa vanofanirwa kurangwa zvakaomarara maringe nemutemo.
“Tine mazita ezvikoro zvinotaurwa zvepuraimari nesekondari zviri kuzivikanwa kuti kune vana vakatosiya chikoro vabata pamiviri. Tinoti mhan’arai nyaya idzi veduwe tichengetedze vana vedu,” vanodaro Kanzura Chigogo.
Inspector Ian Kohwera vanova mutauriri wemapurisa kuMashonaland West vanoti mudunhu ravo mune nyaya dzakawanda dzevanasikana vasati vabva zera vari kupihwa pamuviri vachisiira chikoro panzira.
“Inyaya inorwadza vabereki vanenge vachibvisa mari yechikoro yevana vogumisira vaitiswa pamuviri. Pasi pemutemo, imhosva kudanana nemwasikana asati asvitsa makore 18 okuberekwa. Saka tinokurudzira kuti vanhu vamhan’are nyaya dzakadai, nhubu idzi dzisungwe. Pane varume vazhinji vakaenda kumajeri mudunhu redu reMashonaland West nekuda kwemhosva idzi dzekudanana nevanasikana vari pasi pezera,” vanodaro Insp Kohwera.
Vanoenderera mberi vachiti: “Semapurisa, tiri kushanda pamwechete nemadzishe, masabhuku, makanzura nemasangano anoona nezvekodzero dzevanasikana kuti tione kuti vanasikana vachengetedzwa uyewo nekuva nechokwadi kuti nhubu idzi dzasungwa.”
