Varimi veZvishavane vakapiwa mabhuru

Kingstone Mapupu
VARIMI vanopfuya mombe kudunhu raShe Mapanzure, kuZvishavane vachabatsirikana zvikuru zvichitevera kuwaniswa kwavakaitwa mabhuru emhando yepamusoro izvo zvichaita kuti rudzi rwemombe dzavo dzivandudzike. Mabhuru maviri aya akapihwa kuvarimi ava naCde Cephas Msipa avo vaimbova gavhuna wedunhu reMidlands, rimwe rikabva kunhengo inomirira Zvishavane- Ngezi mudare reNational Assembly, VaJohn Holder.

Ishe Mapanzure, VaCollin Mapanzure (41), vakatenda zvikuru nechipo ichi.
“Chipo chikuru mudunhu rangu izvo zvichaita kuti mhando dzemombe dzivandudzike. Mabhuru ose maviri aya ndeerudzi rwemaBrahman, kutenda kwedu kukuru kuna Cde John Holder naCde Cephas Msipa avo vakatipa mabhuru aya.

“Chirongwa chekuvandudza mombe ichi takazvipa kusvika 2018 apo tinotarisira kuti mhando dzemombe dzedu dzichange dzatanga kusanduka muno,” vakadaro.

“Isu tiri kuti varimi vemombe muno vachaita mari yakawanda sezvo kana tava nemombe dzakanaka, tave kutengesa kungava kuCSC kana kupi mombe imwe chete inogona kutengwa nemari inotangirawo paUS$600 pane kuti izvozvi mombe inogona kutengwa neUS$300 kana kudzika,” vakadaro.

Mabhuru aya anonzi achapota achitenderedzwa mudunhu rose raShe Mapanzure.
Zvakadaro, Ishe Mapanzure vakazokurudzira varimi kuti vadhibhise mombe dzavo nguva nenguva uyewo nekudzibaisa majekiseni kuti dzigare dziine utano. Mumwewo murimi ane mukurumbira mudunhu iri, VaEnock Ganyani avo vane pamusha pari kugara rimwe remabhuru aya, vakatenda zvikuru rubatsiro rwemombe idzi.

“Muno mudunhu rashe Mapanzure tine masabhuku anokwana 47 uko mabhuru aya achatenderera kusvikira nzvimbo ino yose yava nemombe dzemhando yepamusoro,” vakadaro VaGanyani.