admin
MASANGANO anomirira varimi ari kunyunyuta zvikuru zvichitevera danho rakatorwa nemakambani anogaya hupfu rekutanga kutenga chibage neUS$140 patani kubva paUS$300 achiti kuita kwakadai kunodzosera mabasa ekurima munyika kumashure.
Makambani anogaya hupfu akatora danho iri achiti zvakachipa kutenga hupfu kune dzimwe nyika pane kutenga chibage chemuno icho chinozogaiwa zvinova zvinovadhurira.
Mutungamiriri wesangano reZimbabwe Commercial Farmers Union, VaWonder Chabikwa, vanoti Hurumende inofanira kupindira nekukasika kuitira kuti kutengwa kweupfu kune dzimwe nyika kurambidzwe sezvo zviri izvo zviri kukonzera kudzikira kwemutengo wechibage.
Vanoti hazvibatsiri kuti vari mubhizimusi rekugaya vatenge hupfu uhwu kune dzimwe nyika nekuti zvinosiya varimi vemuno vakaomerwa.
“Zvingori pachena kuti vari mubhizimusi rehupfu vanosarudza kutenga upfu hwakachipa hwekune dzimwe nyika zvinova zvinozomutsa makwikwi mubhizimusi rehupfu nokudaro murimi wemuno anorasikirwa,” vakadaro.
VaChabikwa vanoti kunyangwe zvazvo nyika yakatarisana nekushomeka kwechibage kutenga hupfu kune dzimwe nyika handiko kunopedza dambudziko iri.
“Zviri nani kuti vari mubhizimusi rekugaya hupfu vange vachitenga chibage kune dzimwe nyika kuitira kuti vagopa basa kuvanhu vanogaya.
“Hatizivi, kuti hupfu huri kubva kune dzimwe nyika uhwu hahusi hwemaGeneric Modified Organisms (GMO) here kana kuti kwete?” vakadaro.
Mutungamiriri wesangano reZimbabwe Indigenous Women Farmers Association Trust, Mai Depinah Nkomo, vakatiwo kutengwa kwezvirimwa zvinobva kune dzimwe nyika kuri kukanganisa misika yevarimi vemuno.
Vanoti varimi vemuZimbabwe vari kukundikana kuwana mitengo inovagutsa nekuda kwekuti nyika yazara nezvirimwa zvinobva kune dzimwe nyika.
“Isu tiri kutoda kuti mitengo yechibage inge ichikwira kuenda paUS$400 patani kuitira kuti inge ichitigutsa,” vakadaro.
Zvakadaro, imwe nyanzvi munyaya dzezvekurima, VaMidway Bhunu, vanoti zvakakosha kuti mitengo yezvirimwa ive inopa pundutso kuvarimi sezvo izvi zvichisimudzira mabasa ekurima munyika.
“Varimi vanofanira kutsigirwa nemitengo inovagutsa kuitira kuti vagokwanisa kudzokera kuminda mwaka unotevera,” vakadaro.
Online Reporter