Online Reporter
Kingstone Mapupu
VARUME vaviri vaiita zvekupira mashavi emanjuzu vakafira mumvura mudhamu reClydesdale kuGweru nemusi weChipiri.
Mutauriri wemapurisa kuMidlands, Inspector Emmanuel Mahoko, vanotsinhira nyaya iyi vachiti vashakabvu ava ndiPhilemon Matavire (46) wekuWoodlands kuGweru nemumwe asati ava kuzivikanwa zita rake nekwaanobva.
“Nemusi uyu zvinonzi varume vaviri ava nevamwe vavo, avo pamwe chete vaikwana gumi nevashanu uye vaisanganisira madzimai gumi nevarume vashanu, vakaenda kudhamu iri kunopira mashavi avo emanjuzu. Varume vaviri ava vakabva vany’ura mumvura vamwe vavo vakatarisa,” vanodaro Insp Mahoko.
Vanoti nyaya iyi yakamhan’arwa kumapurisa apo pakabva patumirwa nyanzvi dzinosanganisira dzechikamu cheSub Aqua Unit vakabva vaenda kudhamu iri ndokunonyurura mitumbi iyi.
“Pamitumbi yevarume vakaburitswa ava, paiva newaPhilemon Matavire (46) aibva mumusha weWoodlands kuGweru uyewo newemumwe asati ava kuzivikanwa,” vanodaro Insp Mahoko.
Vanoti mudunhu ravo reMidlands maita dambudziko revanhu vanofira mumvura vachinzi vanenge vachiombekana kana kuita zvemanjuzu.
“Nyaya dzemanjuzu dzanetsa kuMidlands, vanhu vari kufira mumvura.
Tinoyambira veruzhinji kuti vasapinde mumadziva kana mumadhamu sezvo vachigona kuny’ura kana kurumwa nezvikara zvemumvura,” vanodaro Insp Mahoko.
