admin
VATAMBI vetsiva vaviri vanoti Kudakwashe ‘Take Money’ Chiwandire naNicola Mutonhora vakahwina mitambo yavo kuMalawi svondo radarika kozoti Tinashe Mwadziwana akakwanisa kuita mangange mumutambo wakewo.
Chiwandire, uyo ari kusimukira zvikuru mumutambo wetsiva, akakunda mutambi wekuMalawi Duduzile Kamukwamba akaita chadzimira muround rechipiri.
Nicola Mutonhora zvakare akahwinawo mutambo wake mushure mekunge azvambaradza Musa Mukwanda wekuMalawi akaita chadzimira muround rechipiri.
Vatambi vemuZimbabwe vatatu ava mitambo yavo yaive yekudziisa nhandare mumutambo waLimbani Masamba wekuMalawi uyo airwira bhande reWelterweight Malawian Tittle iro raakahwina akunda Enerst Msoliza.
Maneja waChivandire, Mutonhora naMwadziwana – Clyde Musonda – anoti vatambi vake vakatamba zvinonwisa mvura kumutambo uyu.
Anoti mugore ra2016, sangano rake reDeltaforce Boxing richabatana nereNo Pain No Gain rekuMalawi iro rinotungamirwa naCraig Reousseau kuronga mitambo yakawanda iyo ichaona vatambi vemuZimbabwe vachirwa nevekunyika iyi.
Anoti iyi ichange iri mimwe yemitambo ichabatsira kuti mazita evatambi vake asimukire apo vanenge vakatarisana nekurwira mabhande akasiyana.
“Vatambi vangu vakatamba zvinonwisa mvura kuMalawi, kuhwina kwavakaita kunorakidza kuti tsiva yemuno iri kusimukira.
“Gadziriro dzavo dzavanogaroita dziri kushanda zvatinotarisira chaizvo nekuti vari kuhwina mushure mekupedza nguva refu vachigadzirira.
“Iye zvino tave kushanda navo kuti tivabike zvakasimba kuti vachitange kurwira mabhande akawanda epasi rese.
“Muno tina Charles Manyuchi anove shasha yepasi rose saka tinoda kuona vamwe vatambi vakawanda vachihwinawo sezvaakaita tive neshasha dzakawanda dzepasi rese,” akadaro Musonda.
Online Reporter