adminSHANGWITI yemujaho wewiricheya, Elford Moyo, anoti chishuwo chake chekuti makambani akasiyana aronge mijaho yakawanda yekuti vakwikwidze sezvo iriyo nzira yavo yekurarama.
Moyo akadadisa mwedzi yadarika apo akahwina mujaho weTanganda half marathon 21km kashanu kakatevedzana izvo zvakamuona achipinda munhorowondo yemujaho uyu.
Gore rino, shasha iyi yahwina mijaho yakaita seTanganda Half Mararthon, Old Mutual Nkulumane 10km fun run, PPC Matopos marathon nemimwe.
Muhurukuro neKwayedza, Moyo anoti kunyangwe hake akwanisa kuhwina mijaho yakawanda gore rino, mumaonero ake mijaho yavo ichiri mishoma zvikuru sezvo iriyo inovararamisa.
“Hatingambode kuvanzirana, mijaho yedu yewiricheya mishoma chaizvo yatiri kurongerwa nekuti mari yatinohwina inenge iri shoma dzimwe dzenguva.
“Kugadzirira kuenda kumujaho iyi kunorwadza sezvo mari yatinenge taburitsa yakawanda chaizvo. Sesu tinokwikwidza mumujaho wewiricheya, tinenge tichida kugadzirisa wiricheya dzedu pamwe nezvakawanda.
“Wiricheya itsva inodhura chaizvo kutenga saka nguva nenguva unofanirwa kutsvaga imwe yekukwikwidza pamwe neimwe yekuitisa gadziriro dzako. Zvino kana pasina mijaho yakawanda inenge ichirongwa saka isu tinozorarama sei?
“Makambani akasiyana kudai atibatsira ipapo,” anodaro Moyo.
Shasha iyi inoti parizvino iri mushishi kuita gadziriro dzayo sezvo ari kugadzirira kuzokwikwidza mumijaho yePPC Harare marathon neOld Mutual Westgate marathon munguva inotevera.
Online Reporter