Online Reporter
Ethel Ncube
ABALIMI bakhuthazwa ukuthi bavikele amatamatisi abo emqandweni ukuze angatshazwa njengoba isikhathi somqando sesiqalile.
UMnumzana Edgar Tapedzisa ongu-Agronomist ukhuthaze abalimi abalime amatamatisi ukuba babone ukuba bayathelezela ntambama ukuze izilimo zabo zingatshazwa.
“Isikhathi somqando sesiqalile, abalime amatamatisi sibakhuthaza ukuba bathelezele besebenzisa ama-sprinkle irrigation ntambama ukuze amatamatisi abo angatshazwa.
“Abenelisayo bangasebenzisa i-green house ukuze isilimo sabo sivikeleke ekutshazweni,” kubika uMnu Tapedzisa.
Uqhubekele phambili eveza ukuba abalimi bangasebenzisa intuthu layo iyavikela ukutshazwa.
“Abalimi bangavikela njalo amatamatisi abo besebenzisa intuthu nxa kuvuma. Bayabe bekhangelelwe ukuthi babase umlilo ozaba lentuthu duze kwesilimo. Intuthu leyo iyancedisa ukuba amatamatisi angatshazwa kodwa kumele umlimi ananzelele ukuba izilimo zakhe azitshi.
“Kuthi abalimi abangalimi ngokuthelezela bengagombolozela isilimo sabo ngotshani indawo yonke ukuze kuncedise ukuvikela amatamatisi ekutshazweni.
“Uhlupho ngalindlela yikuthi umqando ungabuya uvela phezulu amatamatisi akho alakho ukutshazwa umlimi esithi uwavikele.”
Uphethe ngokuxwayisa labo abangelama-green house, sprinkle irrigation ukuthi bame umqando uze udlule ukulima izilimo ezilakho ukutshazwa ngoba belakho ukulahlekelwa yinzuzo yabo ngenxa yomqando.
“Umlimi nxa engenelisi ukusebenzisa indlela zokuvikela ukutshazwa ezigoqela i-sprinkle irrigation, green house lentuthu kumele ame umqando udlule.
“Nxa usebenzisa ezinye indlela ulakho ukubona amatamatisi esetshaziwe, ngokunjalo asenzeni esikwenelisayo ukuze singalahlekelwa yisivuno sethu,” kuphetha uMnu Tapedzisa.
