adminCharity Moyo
INHLANGANISO ebona ngezezifuyo eyeLivestock Production isikhuthaze abalimi abahlala duzane lamapulazi alezinyamazana ukuba benakekele izifuyo zabo ngoba zilakho ukuhlaselwa yimikhuhlane etholakala kunyamazana zendle.
Ekhuluma lentatheli uMnumzana Cosmas Muzunde onguProvincial Livestock Director uveze ukuthi abalimi abahlala duzane lendawo okugcinwa inyamazana zendle balahlekelwa yizifuyo zabo minyaka yonke ngenxa yemikhuhlane evela kunyamazana lezi kungakho kumele banakekele kuhle izifuyo zabo.
Inyamazana ezifana lenyathi zilemikhuhlane eyingozi ikakhulu enkomeni efana lesikhwekhwe kanye le-anthrax kungakho kuqakathekile ukuthi bavikele izifuyo zabo kanye lokuthi bahlale bekhulumisana labe-veterinary ukuze bathole uncedo lapho abayabe bengakwazi khona.
“Inengi labalimi abahlaliswa kutsha libhekane lodubo lokuthi izifuyo zabo ziyahlangana lenyamazana zendle egangeni lokhu kudala imikhuhlane eyingozi kakhulu ezifuyweni efana lesikhwekhwe kanye le-anthrax.
“Ngokunjalo abalimi kabadinge ulwazi ukuze bazi imikhuhlane ehlasela izifuyo ivela kulezonyamazana.
“Lokhu kuzancedisa kakhulu ukuze bavikele inkomo zabo kanye lokwazi ukuthi isifuyo nxa sihlaselwe yilowo mkhuhlane kumele asithengele iphi imithi,” kulandisa uMnu Muzunde.
Uqhubekele phambili esithi umlimi kumele ahlale duzane labodokotela bezifuyo ukuze athole ulwazi kanye loncedo, kuthi njalo izifundo ezenziwa ngabe-veterinary labalimi kuqakathekile ukuthi umlimi azenze ngoba zilusizo.
UMnu Muzunde uveze njalo ukuthi abanye abalimi bayaquma ucingo lwemapulazini besithi bafuna inkomo zabo ziyekudla kulawomapulazini, kodwa kuyingozi ngoba kulapho izifuyo ezithatha khona imikhuhlane.
Uphethe ngokuthi udubo lwamanzi kanye lokudla lonyaka sokubangela ukuthi inkomo lenyamazana kuhlangane ngoba sokunatha ndawonye.
“Ngikhuthaza labo abalezibholane ukuba banathise inkomo zabo khona ngoba bayabe bezivikela kungozi yimikhuhlane ethelelwana nxa izifuyo zingahlangana lenyamazana zendle,” kuphetha uMnu Muzunde.
Online Reporter