Vusumuzi Dube
YiNtatheli kaMthunywa
ABABONA ngempilakahle yezifuyo abe-Veterinary Services sebexwayise abalimi ukuba balimuke umkhuhlane weVibriosis ohlasela izimvu, njalo umkhuhlane lo kubikwa ulakho ukwenza izimvu ziphunze besokusithi eziduna zona zehluleke ukuzalisa. Ngakho ke abafuyileyo kumele bawuqaphele.
Ingcitshi kwezempilakahle eVeterinary Services koBulawayo uDokotela Maria Jakarasi, uthe lumkhuhlane we-Vibriosis, ubangela ukuthi isibaya somlimi singakhuli.
“Umkhuhlane weVibriosis lo ubangela ukuthi imvu ingazali kumbe nxa ingamitha izinyane lifele esiswini. Kwesinye isikhathi imvu izala izinyane elincane elingela mandla life ngemva kwesikhatshana.
Umkhuhlane lo obangelwa ligcikwane yiVibriofoetus. Umlimi ubona ngokungamithi kwemvu okwesikhathi eside loba ukuphunza kwemvu ukuthi isifuyo sakhe sihlaselwe ngumkhuhlane lo,” kutsho uDkt Jakarasi
Utshilo njalo ukuthi umkhuhlane lo uyasinciphisa isibaya somlimi.
“Nxa imvu zingabanjwa ngumkhuhlane lo isibaya somlimi siyancipha ngoba izimvu ziyabe zingasazali. Nxa imvu ingaphunza umlimi uzwa ngephunga elibi eliyabe lizwakala nxa imvu isanda kuzala, lelo phunga yilo elitshengisa ukuthi imvu ilomkhuhlane weVibriosis. Ngakho ke kuqakathekile ukuthi umlimi engananzelela ukuthi imvu yakhe ilomkhuhlane lo ayehlukanise lenqama zingahlangani ukuze zithole isikhathi sokuzihlanza zodwa. Umkhuhlane lo ulakho ukuziphumela wodwa ngesikhathi imvu izala.
“Umlimi engenelisa njalo engananzelela ukuba izimvu zakhe zilomkhuhlane, aye kudokotela wenyamazana lapho azathola khona umuthi amajekiseni amabili ePenicillin dihydrostreptomycin azahlaba ngawo imvu okwamalanga amabili ngemva kokuba imvu isilamalanga amahlanu iphunzile.
Lokhu kunceda ukwehlisa amathuba okuthi imvu iphunze,” kuphetha uDktl Jakarasi.
Online Reporter