Vodzidzisa zvemhuka dzesango

Kingstone Mapupu
VANOONA nezvekuchengetedzwa kwemhuka dzesangano, veZimbabwe Parks and Wildlife Authority (ZimParks), vari kukurudzira vadzidzi vachangopedza chikoro – nevamwewo veruzhinji – kuti vaite zvidzidzo zvekuchengetedzwa kwemhuka nemasango pamwe chete nezviwanikwa kuburikidza nekoreji rayo yeMushandike College of Wildlife Management.

Koreji iyi inowanikwa kunzvimbo yeMushandike, kudunhu reMasvingo, uye yakavambwa mugore ra1987.

VaTrevor Hoko – avo vanova mumwe wevadzidzisi pakoreji iyi – vanoti kune vanhu vashoma vanoziva nezvekoreji yavo.

Zvidzidzo zvinowanikwa pakoreji iyi zvinosanganisira dhigiri rimwe chete, madiploma uyewo macertificates akasiyana pamusoro pekuchengetedzwa kwemhuka, masango nezvimwe zviwanikwa.

Mumwewo mudzidzisi wepakoreji iyi – VaPhillip Hukuimwe – vanoti chikoro ichi chiri kubatsira zvikuru mukupa dzidzo yemachengeterwo emhuka nezvimwe zviwanikwa.

“Mamiriro ekunze munyika medu nepasi rose ari kusanduka zvinosvikawo pakubata mhuka dzedu dzesango nemasango acho. Zvose izvi nezvimwe zvinodziidzwa pachikoro chedu kuitira kuti vadzidzi ava pavanozopedza vave kuenda kumabasa kwakasiyana vanenge vachiziva nzira dzekurwisana nematambudziko ekusanduka kwemamiriro ekunze,” vanodaro VaHukuimwe.

“Chikoro chedu chinowanisa degree reBachelor of Science (Honours) in Wildlife and Protected Area Management apo tinoshanda pamwe chete neyunivhesiti yeNUST rinova iro ratinaro chete richitora makore mana,” vanodaro.

Zvimwe zvezvidzidzo zvinoitwa pakoreji iyi zvinosanganisira zveHigher National Diploma in Wildlife Management (HEXICO), National Diploma in Wildlife Management (HEXICO), National Certificate in Wildlife Management (HEXICO) neNational Foundation Certificate in Wildlife Manangement.

Mukushi wemashoko kuZimParks, VaTinashe Farawo, vanokurudzirawo vadzidzi kuti vaende kunoita makosi akasiyana pakoreji yavo iyi. “Tinoti kuvana nevanhu vakuru ngavauye vadzidziswe mararamiro emhuka mumasango nezvimwewo. Tine mamwe makosi enguva pfupi anosanganisira Learner Professional Hunter and Guides, Tour Guiding, Tracking neParamilitary skills,” vanodaro.