adminTatenda Shuro
vAMWE baba vakazoendesa mwanakomana wavo kudare redzimhosva vachiti avashaisa rugare nekuvabira huku dzavo.
Justice Mutizwa akamhan’arira Takesure Mutizwa kuHarare Civil Court achiti ashaya zvekuita nekuda kwekatsika kake kekumubira huku.
“Mambo wangu, ndakashaya huku mbiri muchikwere uyu mwana agere apa ndiye akadziba. Ipapa ava nemakore 29 okuberekwa asi haaende kubasa. Haashande asi vanin’ina vake vave kutogara voga sezvo vave kuzvishandira nekuzviriritira.
“Mwana uyu akandirova ndabvunza nezvehuku idzodzo. Handichadi kugara naye nekuti achapedzesera aba zvinhu zvakawanda uyezvihombe,” anodaro Justice.
Achipawo divi rake, Takesure anoti anopokana nechikumbiro chababa vake.
“Ndine dambudziko nechikumbiro chavo. Baba handina kumbobvira ndavarova, handingarove baba vangu nekuti ndivo voga,” anodaro.
Anoenderera mberi achiti, “Baba vane muroja wavo aigara pamba aisabhadhara mari yemba saka vakatora zvinhu zvake iye ndokubva pamba, asi ndinofunga kuti ndiye ari kuuya achitora huku nokuda kwokutsamwa kwaakaita.”
Mutongi Tafadzwa Miti akapa Justice gwaro redziviriro.
Online Reporter