adminNyasha Chabvonga
MUKADZI wekupomerwa nemurume wake kuti akazvara mwana chirema nekuda kwekuti haabvire mun’anga akatozokwidza nyaya iyi kumatare.
Diana Muzhowe akamhan’arira Righton Madyise kuHarare Civil Court achiti ari kugara achimushungurudza.
“Unogara uchindituka pamberi pevanhu uchiti ndinoenda kun’anga naamai vangu pamwe nekundipomera hurema huri pamwana wedu kuti ndini ndakazvikonzeresa nekuenda kwangu kun’anga asi iwe uchiziva kuti pakumupona BP yangu yakanga yakakwira,” akadaro Muzhowe.
“Unondirova iwe, hapana chandinotaura chaunoisawo munzeve dzako.”
Akaenderera mberi achiti murume wake haanyari uye haana matyira nokuti anotora zvinhu zvake vasina kuwirirana nekuda kutengesa imba muchivande.
“Kutaura kuno handiti uri kutengesa imba usina kundizivisa?
Unotora mota dzangu uchiita matekisi pasina mvumo yangu. Ini zvokutaura newe handichada zvangu, ndokusaka ndauya kuno kudare,” akadaro Muzhowe.
Madyise akapokana naMuzhowe achiti: “Vedare, handina kumborwara nepfungwa zvekuti ndingatengese imba iri muzita risiri rangu. Iwe, inga unozviziva wani kuti imba iyi ndakakutengera nokuda kwerudo rwandinarwo pauri uye semudzimai wangu anondizvarira vana.
“Kana uchiti ndinokurova buritsa umboo hunoratidza kuti wakamhan’ara kumapurisa kuti ndinokushungurudza. Zvemwana nen’anga zvaunotaura izvo kunyepa chaiko.”
Mutongi Barbra Mateko akapa Muzhowe gwaro redziviriro nererunyararo ndokuti vaviri ava vagarisane zvakanaka.
Online Reporter