Online Reporter
Ethel Ncube
ABALIMI endaweni ezehlukeneyo sebekhuthazwe ukuthi baqedise ukuvuna umumbu emasimini ngoba ukuphuza ukwenza lokhu kulakho ukubangela ukuthi balahlekelwe yisivuno sabo.
UMnumzana Silethemba Moyo ongu-Agricultural Extension Officer kugatsha olubona ngezoMhlabathi, Amanzi kunye lezokuthuthukiswa emaphandleni uthe abalimi kabaqedise ukuvuna umumbu emasimini ungakehli isisindo.
Uthe umumbu ungawoma kakhulu ucina suphambaniseka.
“Sikhuthaza abalimi ukuthi baqedise ukuvuna umumbu wonke oseleyo emasimini ungakawonakali ngoba ulakho ukucina usubolile kubangelwa lalizulu elilokhu liqhubeka lisina kwezinye indawo.”
Uthe ukhuthaza abalimi ukuthi bavune umumbu ungakapheli ubumanzi ngoba ucina ususehla isisindo.
“Sikhuthaza abalimi ukuthi bavune umumbu usalobumanzi obuyi-11 percent njalo bayewuthengisa eGrain Marketing Board (GMB) usaselesisindo,” kutsho uMnu Moyo.
Uthe ukhuthaza abalimi ukuthi bevalele amasimu abo ukuze inkomo zingangeni.
“Sikhuthaza abalimi ukuthi bengangenisi inkomo ukuthi zidle amahlanga omumbu emasimini ngoba ubulongwe benkomo buyaphambanisa isimo somhlabathi,” kutsho uMnu Moyo. Uthe amahlanga omumbu aqakathekile.
“Sikhuthaza abalimi ukuthi bendlale amahlanga omumbu omileyo emasimini ukwenzela ukuthi abambe ubumanzi emhlabathini,” kuphetha uMnu Moyo.
