Online Reporter
YiNtatheli kaMthunywa
UMOYA wesinye isalukazi okuthiwa sabanjwa iganyavu sasesibulawa yindodana lonyanewabo epulazini leMatetsa, eMambo Chimoyo, eMutoko, ngomnyaka ka-2014, kuthiwa ufuna ukubhadalwa ngenkomo ezingu-13.
UGogo uSusan Madhuku Chomusina, owabulawa eleminyaka engu-72 yokuzalwa, kuthiwa wabulawa mhlaka 24 Mpandula ngomnyaka ka-2014 ngemva kokubanjwa iganyavu yindodana kanyanewabo epulazini.
Osolwa ngalelicala nguSimon Chomusina (59).
Isikhulumi samapholisa esigabeni seMashonaland Central, u-Inspector uMilton Mundembe, uqinisekise ukuthi badinga uSimon Chomusina ngenxa yecala lokubulala.
Ngesikhathi kusenzakala lokhu, abendlu yakoChomusina babehlala kuPlot Number 346, epulazini leMatetsa, eMutoko.
Umyeni kamuyi, uMnumazna Elias Chomusina, wayehlala epulazini leli lamakhosikazi akhe amabili okungu Gogo uSusan Madhuku Chomusina, owayengunkosikazi omdala; loGogo u-Annah Madhuku Chomusina, umfazi omncane.
UMnu Ephraim Chomusina (59), indodana yomfazi omdala, uthi unina ebulawa ngaleyondlela, abendlu yangakibo bavumelana ukuthi lelicala lingabikwa emapholiseni loba kubukhokheli besigaba ababehlala kuso.
Uqhubeka esithi icebo leli lavela kumalumabo, okungumfowabo kanina.
“Umama lo, umfazi omncane kababa, babengomakhelwane abazwanayo. Ngakho-ke, umalumethu, umfowabo kamama, wala ukuthi lelicala lisiwe emapholiseni kumbe ukwazisa induna ngemva kokuthenjiswa inkomo ezintathu ngumuntu owabulalayo, okuyizinto abangazange bazinikwe. Isidumbu sikamama sangcwatshwa kwangathi akwenzakalanga lutho nje,” kutsho uMnu Ephraim Chomusina.
Uthi lanxa udaba lolu lwagqitshwa ukuze lungaphumi, umoya kamama wabo waqala ukuvela kundodakazi yakhe, uNkosazana Josephine Chomusina (29), esitsho ukuthi ufuna ukubhadalwa.
“Umoya kamama waqala ukugulisa indodakazi yami usithi ufuna ukubhadalwa ngenkomo ezilitshumi lantathu, athi kumele zibhadalwe ngumfowethu okuthiwa nguye owabulala umama. Umoya lo uthi umfowethu lo wakwenza lokhu elabanye abantu abane. Njengomdeni, sake sahlangana lomfowethu lo wavuma ukuthi kuliqiniso ukuthi nguye owabulala umama,” kutsho uMnu Ephraim Chomusina.
UNkosazana Laiza Chomusina (52), indodakazi kagogo owabulawayo, uyaqinisekisa ngodaba lomoya osuvela lo.
“Umama wabulawa ubaba esekhona, udaba lolu lwagqitshelwa. Umoya lo usufuna inkomo ezingu-13 okumele zivele kulowo owambulalayo,” kutsho uNkszn Chomusina. Uthi osolwa ngokubulala umama wabo wambika emapholiseni eHarare, udaba lolu lwasiwa emapholiseni eRushinga, lapho asehlala khona.
UNkosazana Josephine Chomusina, yena ofikelwa ngumoya lo, uthi umzimba wakhe usuhlala ubuhlungu.
“Umoya lo uyangihlupha. Isifiso sami yikuthi, njengomdeni, sihlanganise amakhanda, inkomo lezi zikhitshwe, ngoba sekubangela ukuthi umzimba wami uhlale ubuhlungu,” kutsho uNkszn Chomusina.
UMnu Rangarirai Muranga, ongumfowabo kagogo owabulawayo njalo okuthiwa nguye owenza ukuthi udaba lolu lungabikwa emapholiseni, ukuqinisekisile ukuvela komoya lo. “Liqiniso, amazwi engiwezwayo yikuthi umoya kadadewethu usuvela kumzukulu wakhe. Njengomalume, ngihamba labo abazukulu laba ukuthi kulungisiswe, kodwa lokho okokuthi ngathenjiswa ukuthi ngizaphiwa inkomo ukuze udaba lolu lungabikwa emapholiseni ngamanga,” kuphetha uMnu Muranga.
