Online Reporter
Nkosilathi Sibanda loFungai Muderere
UKUDLALELA iqembu le-Orlando Pirates kuyisifiso sabadlali benguqu abanengi. UTendai Ndoro walifeza leliphupho, esuka elokitshini lakoBulawayo, waze wafika eSoweto, eGoli, eSouth Africa.
Ngesikhathi abanye besaphupha, yena wayesetshibilika lamaBhakaniya esengumdlali kuzwa kwezikaMagebhula.
UNdoro waba ngumdlali wakuqala odabuka koBulawayo, owagqoka isikipa sePirates.
Esemzini wamaBhakaniya, uNdoro waphenduka waba yintandokazi kazulu, wathandwa langabasekeli bezitha zePirates, wabatshazwa emsakazweni lakumabonakude eGoli. Kwaze kwakhala lomuyi uBab’ uMthethwa emsakazweni, esithi “Kwangena Fire, uNdoro, umfana wakwaBulawayo, eZimbabwe”.
Kubalandeli benguqu, uNdoro ngesikhathi sakhe ubephethwe emlonyeni. Ubakhethuzile enkundleni, wabatshengisa ukuthi isiphiwo sakhe sikhulu okunganani. Bamnika ibizo elithi “Fire” ngoba ubevutha umlilo enkundleni. Lapho akade elithola khona ibhola, bekukhala onozinti ngoba elikhatshwa nguye belivutha esandleni.
Kwasala kancane nje ukuthi abethwe njengomgadli ohlohle okwedlula abanye eseSouth Africa. Kodwa, ithalenta laziveza lodwa kuye. Wazalwa efumbethe okaNdoro.
UNdoro wadlalela ilizwe ekumaWarriors, wenza udumo kuNico United, Chicken Inn, Orlando Pirates, Mpumalanga Black Aces, Ajax Cape Town laseSaudi Arabia ku Al-Faisaly.
Ufele eSandton, eSouth Africa.
Kukho konke akwenza enkundleni, abanye adlala labo bakhuluma ngokuthi ubeyindoda emadodeni, umdlali owayesazi umdlalo wenguqu engawuphumputhi.
Lakanye wakuveza lokhu kuleli, eBotswana, South Africa lase-Saudi Arabia.
Phandle kwenkundla, umuyi uchazwe ngokuthi ubezithobile, engumuntu obekhetha ukuthi angawuvuli umlomo.
Ubelothando ngokutsho kukaDanny Phiri, umdlali wenguqu.
“UTendai nguye okade esikhuthaza ukuthi sibambane eSouth Africa. Ubethatha isikhathi ukuthi asivakatshele sonke, athenge ukudla lokunathwayo uma sihlangene njengabadlali abavela eZimbabwe. Ngibuhlungu ngokuthi useselizweni lamathonga. Lala ngokuthula Fire,” kutsho uPhiri.
Uzabekwa kuleli, ngokutsho kukayise uSilas Mukundwa.
“Okwamanje ngeke sitsho okunengi ngamalungiselelo omngcwabo, kodwa uzabekwa eZimbabwe. Silinde ukuzwa kulabo abaphethe umsebenzi khonale eSouth Africa.
Unina kamuyi, uChristina Mukundwa unxuse bonke abantu, ikakhulu labo abadlala inguqu laye, ukuthi bathakazelele impilo yomntanakhe.
“Nginxusa bonke abadlala loTendai ukuthi babuye bezothakazelela impilo yakhe. Kunengi uTendai Ndoro asenzela khona njengemuli. UNkulunkulu uyazi, usemthethe,” kutsho uNkskz Mukundwa.
Uyise, uSilas Mukundwa uthe: “UTendai ubengakhulumi lomuntu. Njengemuli sisalinde ukuzwa ukuthi kuyini okwenzakale kuTendai. Sisebuhlungwini. Sithanda ukubonga bonke abadlala laye.”
Kusenjalo, osaziwayo kumdlalo wenguqu eSouthern Africa sebebike ngokudabuka okukhulu ngokwedlula emhlabeni komdlali uNdoro.
Abantu babuthene ku-1976 eNketa 8 koBulawayo.
derick.khumalo