Bhekimpilo Tshalibe
UKUPHILA nzima kunye lokudakwa okwedlulisileyo kungabe kuyikho okukhokhele ukuthi indoda yeBurombo Flats koBulawayo icine ibulele umkayo ngokutsho kwesinye isihlobo.

UMeluleki Ndlovu oleminyaka engu-44 yokuzalwa ubulele umkakhe ngoMgqibelo owedluleyo ngokumphosa esitezi ngefasitela kulandela ukuxabana.

Kuvele ukuthi uNdlovu wayesilwa lomkakhe emtshaya ngamampama ngaphambi kokuthi amphose ngefasitela lapho afika wawa watshaya phansi ngesisu.

UMthunywa uvakatshele eBurombo Flats waxoxisana lesihlobo esiveze ukuthi impilo yemuli le yiyo engabe ikhokhele ukuthi bahlukuluzane kucine kulesidumbu phansi.

“Umntanethu loMeluleki bebephila nzima njalo bebengasebenzi. Indoda ibiphila ngokufuqa isikaniya (inqola) eRenkini kukanti owami yena ebesenza ama-piece jobs okuwatshela abantu.

“Olunye uhlupho yikuthi uMeluleki ubevele edakwa kakhulu. Athi angafika endlini edakiwe atshaye umfazi. Ababili laba baleminyaka elitshumi behlala bonke njalo balomntwana oyedwa oleminyaka engu-9,” kutsho isihlobo lesi.

UMeluleki Ndlovu umiswe emthethwandaba wakoBulawayo ngoLwesibili esetheswa icala lokubulala unkosikazi wakhe, uSiphiwe Ndlovu oleminyaka engu-33. Ukhangelelwe ukuphenduka emthethwandaba mhlaka 4 Mbimbitho.