adminBAKWETHU ngithemba lisakhumbula ukuba ngithe kokunye kwalokho esikuthola ehofisini kaCommunity Relations and Liaison Officer (CRLO) weZimbabwe Republic Police (ZRP), kukhona umsebenzi akhangelelwe ukuwuqhuba ogoqela owokuqinisa lokugcizelela inhlelo zonke esezabonakala ukuba ziyaphathisa kuqoqo lenhlelo zomanyano kazulu lamapholisa lezi ezethiwa igama likaCommunity Policing (CP).
Kule indatshana esikuyo lamuhla; ngizaphatha esinye njalo isibonelo senhlelo zeCP lezi ezikhangelelwe ukuqiniswa nguCRLO; uhlelo lweNeighbourhood Watch Committee (NWC). Lokhu ke sokuzaba yikuphetha kwethu uhlelo lukaCRLO sesisungula olweNWC njengokuthembisana kwethu siqalisa inkuthazo yokuba siphathisane lamapholisa ethu ekulawuleni umthetho.
Kundatshana yethu edluleyo sithe thina sizaqhubeka sijula ngohlelo lwethu olweZRP CRLO. Lokhu ngikwenzela ukuba lapho sesixoxa ngezinye zonke inhlelo zeCP, sibe sesikwazi ukuba zitholakala kuyiphi ihofisi njalo ziphathwa ngubani emapholiseni eZRP. KweleZimbabwe, kuthe kusukela ngo1985 kusungulwa iqoqo lenhlelo zeCP, oCRLO baphatha umsebenzi omkhulu kakhulu owokufundisana lomphakathi ukuba inhlelo ezigoqela olweNWC lePolice Constabulary zijonge ukuphathisa uzulu lamapholisa ukuze benqabele kumbe baphungule ukudalwa kwamacala ezigabeni zabo.
Phela kubikwa inengi labantu lalicabanga ukuba inhlelo lezi zihlose ukuxabanisa uzulu lokuhlanyela abathengisi phakathi komphakathi okwakubukeka sengathi kungahle kwehlukanise uzulu, kulethe indwetshu lokungahlaliseki kanti ke hatshi, ngumanyano omuhle nje. Babafundisa ke abantu oCRLO kusukela ngo1985 kwaze kwayafika umnyaka ka1995 lapho amapholisa agcizelela khona inhlelo zawo zomanyano wawo lozulu kunye lalokho akhangelelwe ukukwenza, ngokwethula isithembiso sawo esethiwa igama lokuthi yiZRP Service Charter. Bakwethu, lesi sithembiso ngasichaza ngokugcweleyo ngaphambilini lanxa nje ngingavaleli abangafuna ukubasazi njalo ngoba kulilungelo lomphakathi wonke ukuba libesazi. Saziseni sicebisane.
Siyalibonga mahlabezulu ngoba kubikwa layamukela imfundiso yaboCRLO leyo kwaze kwaba lalamuhla lokhu, lokhe liphatheka kunhlelo zomanyano kazulu lamapholisa lilwisana lokudalwa kwamacala ezigabeni zenu. Lingadinwa bakwethu. Umzekeliso womsebenzi omuhle oqhutshwa ngoCRLO lamalunga eNWC ngonanzwe nguSibalukhulu wamapholisa eMashonaland West uAssistant Commissioner (Crime) okutsho ukuthi obona ngezokudalwa kwamacala kumbe esizithi ngezakoCALA lomzali wakhe uSigilamkhuba thina kuWatsha Tsotsi. Inkokheli le eqinise izakhamizi zeKadoma yazincoma lokunanza umsebenzi wazo omuhle eziwuqhube lonyaka nguAssistant Commissioner Charles Chagoda.
UAsst Commr Chagoda unikeze uPolice Constable (P/Cst) Jane Shoko, Police Constable Knowledge Gwatidzo loPolice Constable Meki Nhemera izithupha zokuqhuba umsebenzi wesipholisa ngobunono baphezulu amaCertificates of Competency.
Abathathu laba ngamalunga eZRP Kadoma Rural, ZRP Rimuka leZRP Kadoma Central Police Station ngokulandelana kwabo. Kubikwa uNkszn Shoko kakudinganga ukuthi ungowesifazane kodwa wathi esedobhe udlebe lokuba kulomuntu owayezathwala izidakamizwa esuka lazo eGokwe ezisa ePatchway eKadoma, waqoqana labanye bakhe bacathamela imota eyayizobe ilezidakamizwa lezo endleleni. UShoko wasebenzisa ubuchopho lokukhalipha ekuhleleni lekukhokheleni iqula lakhe ngoba bathi becatshile kwenye yezindlu zasenkomponi yeGolden Valley Compound, omunye walabo ababethwele izidakamizwa, wadlula lakuleyondlu. Dukuduku, engalindele zabe sezimkhalele uSiphiwe Mushati odabuka esigabeni sakoDube ngaphansi kwenduna uNeuso eSanyathi.
Bamsetsha kunye lokumbuzisisa ngobuciko uSiphiwe, baze bavumbulula imbanje ezisinda okwama kilogramme angu 0,644. Amtshisa ke amalunga eNWC ethembile uSiphiwe Mushati. Sikhuluma kunje nje, usejele uyapika okwenyanga ezilitshumi lanhlanu (15) azigwetshwa ngumantshi weKadoma. Kungakapheli nsuku zatshwala, u P/Cst Shoko, owayevele esola ukuba uMushati angeke abe esebenza yedwa, walucubungula lolodaba waze wavumbulula abanye njalo ababili uSithembeni Ncube loSarudzai Chiwoyo abathola belembanje esinda okwama kilogram angu 1,305.
Ababili laba bona bathi ngemva kokutholakala belecala, bagwetshelwa ukuhlala ejele okwenyanga ezilitshumi ngamunye ngamunye.
UP/Cst Gwatidzo yena wadazulula udaba lokugqekezwa kwenye indlu yaselokitshini leRimuka eKadoma lapho okwatshontshwa khona i-laptop ebiza intengo ye $500-00. UMnumzana Gwatidzo wathungatha, waphembela wasebenzisa inengi lamaqhinga esipholisa okwamenza wacina esesivumbulula isigilamkhuba esasifihle impahla eligugu lelaptop esporweni sikaloliwe esixhuma uBulawayo lesigodlo iHarare. Isigilamkhuba lesi satholakala silecala sagwetshelwa ukuhlala entolongweni okwenyanga ezingu-15.
UP/Cst Nhemera walaya esinye sezisebenzi zasezindlini zedolobho laseKadoma, uTakura Muzira owayetshontshele umuntu ayemsebenzela. Yeyi madoda, kunzima! Kanti ukuthembeka kwezisebenzi sokwaphelelaphi? UTakura nguye owaba lomnyama ke ngoba wagwetshelwa ukupika okweminyaka emibili elengxenye, esebenza gadalala ukuze abe yisibonelo phakathi kwezisebenzi zonke ezingathembekanga. Ngqobe! IKadoma isikuvezile, thina ke?
Umlobi utholakala ku-(04) 700171-9 Extension 3193; 0735752386/0716616987/ 0783185092/[email protected]/ [email protected]/[email protected].
Online Reporter