admin
Ethel Ncube
BASELE betshe amathe abathengisi bemakethe ku5th Avenue koBulawayo kulandela ukubonakala kwegabha ledobi ebelilenyoka ephilayo phakathi komgwaqo.
Kubikwa ngeviki ephelileyo ngoLwesine ngemini yantambama kwabonakala umhlola phakathi komgqwaqo abantu belibele nanko phela kwavela igabha ligcwele inyoka phakathi
Okwamangalisa abathengisi yikuthi kakho owaziyo ukuthi lelogabha lenyoka laphoswa ngubani emgwaqweni owangaphi okwenza bacabangela ukuthi mhlawumbe ngeyomunye wabo ongabe eyisebenzisa kubhizimusi.
Intatheli ixhumane lomunye wabathengisela kule indawo uNkosazana Hazel Moyo oveze ukuthi lokhe bengalankani ngalokhu abakubonayo.
“Sasizithengisela amatamatisi kanye lembhida sezwa omunye wethu ehlaba umkhosi esithi nanso inyoka. Ngeqa ngisithi mhlawumbe iphansi kwami ngathi ngithi mehlo suka ngayibona ivalelwe egabheni ledobi ibekwe duze lalapho esithengisela khona.
“Umbuzo engilokhu ngizibuza ngiswela impendulo yawo yikuthi yayifakwe ngubani phakathi kwegabha inyoka,” kubika uNkszn Moyo.
Uqhubekele phambili echaza ukuthi kukhona owayilahlayo ayizanga yodwa.
“Inyoka le ilomnikazi lanxa thina singamazi njalo ngiyakholwa ukuthi ibingumuthi wakhe wokuthola abathengi.
Indlela igabha leli elalihlezi ngayo alitshengisi ukuthi lingabe lawa phansi kukhanya labekwa kuhle phansi. Sathi sibuzana ukuthi kukhona yini ongabe embonile ofake igabha lenyoka leli kwasweleka ukuthi ngubani,” kubika uNkszn Moyo.
Ekhuluma loMthunywa omunye osebenzela emakethe unNkosazana Chelesani Dube uchaze ukuthi lokhe bemadolo nzima ngomhambaphansi.
“Ngangivela dinga isikwelede sami komunye umngane wami ngathola abantu bebuthanele igabha ngamangala ngibona inyoka igcwele phakathi iphila kulamanzi phakathi. Akula owalibambayo igabha leli bonke bathapha ngamehlo nje kuphela. Saze satshayisa ntambama lilokhe likhona lemota zingaligxobi,” kutsho uNkszn Dube
Iphephandaba likazulu lizwe ukuthi kungabe kukhona ogangileyo obesebenzisa inyoka le ukuthi kube nguye obamba imali yedwa wabona sokunzima wayilahla.
Intatheli ixhumane njalo loNkosazana Sithembelenkosi Mahlangu oveze ukuthi lokhu abakubonayo kuyisimanga njalo kuyethusa.
“Mina ngileminyaka edlula emihlanu ngithengisa emakethe angikaze ngibone inyoka. Le ehlala egabheni iyasimagalisa ukuthi ivele ngaphi njalo ibidingani. Lapho ebikhona akuminyananga okokuthi ingabe yangena ngephutha kodwa igabha laselivalwa ngubani walitshiya phansi. Okwenza sicabangele ukuthi ilomnikazi yikuthi ngelanga elilandelayo sathi sifika sathola ingasekho.
“Kukhona ukuganga okuthize okwenzakalayo lapha kumbe yiyo ebisixotshela imali amatamatisi ethu ebecina ebola engasathengwa kodwa lokhe sayibonayo siyake sithengise sithole okuyimadlana,” kuphetha uNkszn Mahlangu.
Online Reporter