Online Reporter
Lovemore Dube
UMARVELOUS Nakamba uzaba lomncintiswano wama-Under 17 owenguqu eHwange ngempelaviki, injongo kuyikuthi bathuthuke.
Imidlalo le, elamaqembu alitshumi izabe isenkundleni yeChakona, edolobheni leHwange. UNakamba udlalela iqembu leLuton Town eNgilandi njalo useke wadlala kuEnglish Premiership.
Umdlali lo wakhulela eHwange. Uyise kaNakamba ukhulume leZimpapers Sports Hub ngamalungiselelo emidlalo yangempelaviki.
“Kuhle ukuthi siphathise ekukhuleni komdlalo webhola lenyawo kwabatsha ngoba bayikusasa yomdlalo njalo ngilokujabula lami ukuthi size lawo ekhaya, kithi esivela khona eHwange.
“Lapho okuzadlalwa khona, lami ngikhula ngadlala khona,” kutsho uAnthony Nakamba uyise kaMarvelous.
Uthe amaqembu azadlala azavela eBinga, Harare, Hwage, Bulawayo, Dete, Nkayi leVictoria Falls. Uthe umzamo wabo yikuthi imidlalo le ibenge yelizwe lonke, abatsha abavela kuzigaba lamadolobho bathole labo ithuba lokudlala lapha.
“Imidlalo siyiqale ngo2022. Sike sama kulokunye okuncane ebesikulungisa ukuze ihlale ikhona njalo iqhutshwe kuhle. Ngo2022 saba lamaqembu ayevela kundawo ezibalisela iMutare. Lonyaka silamaqembu avela eHarare, Bulawayo, Victoria Falls, Hwange, Dete, Binga leNkayi. Kuyasithokozisa ukuthi sizabe silabantwana abavela kundawo ezitshiyeneyo,” kutsho uAnthony.
Uthe ukuza kwamaqembu avela kuzigaba ezitshiyeneyo kutshengisa amandla omdlalo webhola ekuhlanganiseni abantu, kungela bandlululo.
“Kuhle ukuthi sizaba labantwana abavela kuzigaba ezitshiyeneyo. Bazasuka bedobhe okubili okuthathu ngolimi lwabanye lamasiko njalo kulothando lokubambana,” ugcizelela uAnthony.
Amaqembu amenyiweyo agoqela iBinga Academy, iHighlanders, Njube Spurs, Biya and Friends, GG (Harare), Scottland, Nkayi Academy, Ponel Academy yeDete, Hwange Select leGolden Lions yaseVictoria Falls.
Amaqembu la azagqokiswa yiMarvelous Nakamba Foundation.
