adminCornelius Luphahla
Zibambe oluphuphumayo izakhamizi zesigabeni seMbembeswana ngemva kokuba enye indoda ibhuqwe kabuhlungu ngumkayo waze wayephula ingalo ngenxa yokujola.
Isiga lesi senzakale ngoLwesihlanu kuviki ephelileyo lapho uSehliselo atshaye khona umkakhe uMduduzi Phiri ngomphika waze wamephula ingalo ngemva kokumthola ethandelane loSiphiwe Nkomo, uMthunywa ukuzwile lokhu.
Intatheli ixhumane loNkosazana Cristabel Mkwananzi omunye wezakhamizi zakule indawo wachaza ukuthi uMnu Phiri wayeselesikhathi eside ethandana loSiphiwe.
“Mina kudala ngakubona ukuthi uPhiri uthandana loSiphiwe njalo abantu babehlala bemkhuza yena elenkani. Noma nje abantu bengazange bamtshela umkakhe kodwa laye useze wazibonela yikho eze wamephula ingalo,” kuveza uNkszn Mkhwananzi.
Uqhubekele phambili njalo walandisa ngokutshaywa kukaMnu Phiri ngumkakhe.
“Sathi sihlezi koNcube emdlalweni womyaka omutsha sezwa uMaNdlovu ethi umkakhe uyamdelela manje ufuna ukumfundisa impilo. Kusenjalo wasukuma ethwele umphika ayewugezisa waqonda ngemuva komuzi lathi salandela.
“Sithe sisalandela sabona uPhiri ethandelane loSiphiwe, uMaNdlovu wathi efika lapho uSiphiwe wabaleka umkakhe wathi ezama ukukhulumisana laye wabe uzithelile. Wakhala umphika emadolo kaPhiri wahle wawela phansi lathi sagijima sisiyalamula kodwa sathola setshaye ingalo yaze yephuka njalo elokhu emdinda. Kwaba yikho-ke ukusila kukaPhiri wasethwalelwa esibhedlela seBubi,” kulandisa uNkszn Mkhwananzi.
Kuzwakale ukuba ngemva kokuba uSiphiwe azwe ukuthi usomoya wakhe utshaywe waze wephuka ingalo njalo uMaNdlovu ufuna ukumudla angasuthi, wahle watshaya utshani lakhathesi akwaziwa ukuba walubhekisa ngaphi.
Ebuzwa ngale indaba uNkosazana Siphiwe Ndlovu uveze ukuthi wayecaphuke kakhulu yikho wephula umkakhe.
“Umkami ngamtshaya ngingajonganga ukumephula njalo ngangicaphuke kakhulu ngoba uSiphiwe engangifuna ukumtshaya wayesebalekile. Noma nje umkami walimala kodwa khathesi uphumile esibhedlela sengcono njalo sesakhulumisana,” kuphetha uNkszn Ndlovu.
Online Reporter