adminYiNtatheli kaMthunywa
ZISELE zikhakhamele izakhamizi zeNyumbane, eMatopo ngesikhathi zibamba isela elatshontsha inkomo zezakhamizi nanko phela zithe zilifundisa isifundo ngokulibhaxabula zafumana ukuthi libophele intebe ezesabekayo ezigoqela lomsila wempisi eqolo ngeviki ephelileyo.
Kuzwakale ukuthi intebe lezi zithe zivela uHloniphani Dube waveza ukuthi ubezisebenzisa ukutshontshela izakhamizi nanko phela wonke umuntu abemtshontshela ubefikelwa yibuthongo obukhulu angabe esazi lokuthi kuhamba njani kuthi amapholisa lawo abeswela icala kuye.
UMthunywa uzwe ukuthi umsolwa lo usebenzisa izibongo ezitshiyeneyo ezibalisa esakoNcube lesakoNdlovu.
Iphephandaba likazulu lixhumane loziveze ngokuthi nguNakaNdodana nje kuphela othi wayekhona mhla kuvela intebe kunye leminye imithi kaDube waveza ukuthi kakaze abone into eyesabeka kangaka.
“Undoda lo watshontsha inkomo ezingu-6 esigabeni esebenzisa umuthi. Simangele sonke eseveza ukuthi ngenxa yentebe zakhe ubesenelisa ukuthi enze abantu balale inqondo lokuthi amapholisa aphele amandla nxa ezama ukumbopha. Ngitshe amathe esebanjwe yizakhamizi zathi zimtshaya kwakhithika umsila wempisi waveza ukuthi ngumuthi wakhe wokuchitha amacala,” kubika uNkszn Ncube.
Uqhubekele phambili waveza ukuthi abakubonayo kwabaqeda amandla.
“Lokhe ngimadolo nzima ngalokhu engakubonayo, uHloniphani ulesibindi sibili, aze agcine umuthi owesabeka kangaka. Intebe zakhona sazibona sonke zazisesabeka njalo zibotshelwe eqolo, ngempela siphila labantu abaphethe umuthi omubi singazi.
“Ngempela umuthi wakhe uyamsebenzela ngoba kulepholisa elake lathi lizama ukumbopha labanjwa yisiyezi kukanti lasemthethwandaba indaba yakhe yehlula kwabikwa ukuthi kalacala amapholisa yiwo aphambanisileyo,” kutsho uNkszn Ncube.
UMthunywa ukhulumisane lesinye isakhamuzi uMnumzana Dingani Ncube wachaza ukuthi izakhamizi zilamathe ngemithi kaHloniphani.
“Sathi simkhipha imithi lomsila wempisi lo owawuseqolo wathi kungalahlwa zintebe zakhe njalo uphila ngakho kodwa thina asizange sikuzwisise. Ngizibonele ngawami amehlo hatshi ukutshelwa, icala selifike lehlula ubufakazi bukhona ukuthi ubetshontsha inkomo azihlinze enze imihwabha. Emthethwandaba kutholakale ukuthi kalacala, amapholisa alamanga yikho engibone khona ukuthi intebe zichithize icala,” kutsho uMnu Ncube.
Iphephandaba likazulu lizwe ukuthi umsolwa uDube ubesenza abantu esigabeni balale inhliziyo bangabi lendaba lanxa esona lamapholisa amekele enjalo.
Intatheli ixhumane lonkosikazi kamsolwa uNkosikazi Thandekile Dube ovumileyo ukuthi umkakhe ulentebe ahlala ezithwele.
“Kuliqiniso sibili ukuthi umkami ulemithi abehlala elayo ekhalweni. Ngangithi nxa ngimbuza wayengachasisi kuhle ukuthi ngeyani. Ngizwe kuthiwa kukhithike imithi ebisekhanda lakhe lomsila awubophele ekhalweni ngesikhathi esebanjiwe ekugangeni kwakhe. Yikho engingakutsho kuphela,” kuphetha uNkkz Dube.
Umsolwa usezandleni zamapholisa.
Online Reporter