admin
Kudliwa kunathwe amahewu ngesikhathi sokutshisa
Isikhathi siyehlukana phakathi komnyaka. Sikhona esomqando kubekhona ezokutshisa. Nxa kuqanda sidla ukudla okutshisayo ukuze sifudumale kuthi nxa kutshisa sidle okuqandayo.
Lamuhla inengi labantu selinatha okuqandayo okwehlukeneyo okuthiwa ngamanamunede (drinks) kanti endulo bekunathwa amahewu kuthi abanatha utshwala banathe umhiqo labo utshwala ngokwabo. Konke okunathwayo ngezikhathi zokutshisa kuyabe kuqanda ukuze kuqandise umzimba. Amnandi bo amahewu nxa uthe wawenza kuhle njalo ayasuthisa. Lamuhla ngizakuthi fahla fahla ngokuphekwa kwamahewu ukuze lawe uziphekele emzini wakho, khona uzanatha ukholise. Kuhle ngoba amahewu awadaki, ungaze uwanathe wedlulise.
Amahewu
Okudingakalayo
► Ilambazi
► Impuphu
► Imithombo yophoko
► Imbiza yokupheka enkulu
► Uphoko lokwenza imithombo
► IqHaga kumbe izikali zokuvubela amahewu
► Itshukela ngesilinganiso sakho
►Umganu omkhulu
► Inkomitsho zokunathisa amahewu
► Indawo eqandayo yokubeka amahewu
► Uphehlo kumbe uphini
► Amalembu ahlanzekileyo okusibekela konke ozakusebenzisa ekuphekeni amahewu
► Izandla ezihlanzekileyo
► Inani labazanatha amahewu
► Ingabe uwenzela idili ozaba lalo kumbe imuli yakho linganisa ngesilinganiso sakho
► Hlanzeka ngokwakho wena mpheki wamahewu
Okwenziwayo
Bilisa uphoko uluchaye lome sibisibili.
► Khathesi chola imithombo wenze imvubelo.
► Thatha imbiza lempuphu upheke ilambazi.
► Beka ilambazi lakho laphaya lingani liyaphola.
►Goqoza ngophini kuhlangane sibisibili.
► Beka ilambazi lakho laphaya ulisibekele njalo ubone ukuthi alijiyanga kakhulu.
► Yekela laphaya livaliwe okwensuku ezimbili.
► Nxa selibila lizafuqa ilembu ngoku-khukhumala.
► Vula uligoqoze ulizwe ukuthi libilile yini.
► Thela itshukela ngesilinganiso sakho ugoqoze.
► Asengamahewu akho, kathesi wathululele ezikalini ezehlukeneyo.
► Wabeke laphaya endaweni eqandayo.
► Kungaba phezu kwesaka elimanzi ukuze kungabi munyu.
Asenganathwa ngokuthanda kwakho khathesi abantu bazikholisele. Amnandi ngempela.
Online Reporter